00։41 Քիչ առաջ ոստիկանության հասարակայնության հետ կապերի վարչության պետ Աշոտ Ահարոնյանը, անդրադառնալով լրագրողների դեմ բռնություններին, գրել է․

ՊՊԾ գնդի անվտանգության գոտին ճեղքել փորձող անձանց դեմ ոստիկանությունը հատուկ միջոցներ է կիրառել: Տեղի է ունեցել բախում, ինչի հետևանքով, ցավոք, տուժել են նաև լրատվամիջոցների ներկայացուցիչներ, ըստ նախնական տվյալների՝ կա վնասված տեխնիկա: Լրատվամիջոցների ներկայացուցիչների հետ կապված բոլոր միջադեպերն անհապաղ քննության կառնվեն, կպարզվեն հանգամանքները, ինչի մասին լրացուցիչ կհայտնվի:

00։30 Մարդու իրավունքների պաշտպանի աշխատակազմը հայտարարություն է տարածել․

Մարդու իրավունքների պաշտպանի աշխատակազմ հաղորդումներ են ստացվել այն մասին, որ բռնություններ են գործադրվել լրագրողների նկատմամբ, ինչպես նաև խոչընդոտվել է նրանց աշխատանքը: Ըստ մեզ ներկայացված տեղեկությունների՝ դրանք արել են քաղաքացիական հագուստով ոստիկաններ:
ՀՀ Ոստիկանությունը պետք է անմիջապես ներկայացնի պարզաբանումներ լրագրողների նկատմամբ բռնությունների գործադրմանը, նրանց գործունեությանը խոչընդոտելուն քաղաքացիական հագուստով ոստիկանների հնարավոր ներգրավման մասին:
Մեր կողմից բոլոր հրապարակումներն արձանագրվել են, դրանց հիման վրա անհրաժեշտ է անմիջապես հարուցել քրեական հետապնդում, իրականացնել մանրամասն քննություն և բացահայտել բոլոր մեղավոր անձանց:
Այն քաղաքացիներին, ովքեր տիրապետում են 1in.am, azatutyun.am, armlur.am, a1plus.am «Արմենիա» հեռուստաընկերության լրագրողների նկատմամբ բռնության գործադրման կամ ոստիկանների հնարավոր ներգրավման մասին վկայող տեսանյութեր, խնդրում ենք դրանք անհապաղ տրամադրել Պաշտպանի աշխատակազմին: Հեղինակների ինքնության գաղտնիությունը երաշխավորում ենք:
Ահազանգեր են ստացվել նաև քաղաքացիների բերման ենթարկելու, նրանց նկատմամբ բռնություն գործադրելու վերաբերյալ: Այդ ուղղությամբ արդեն իսկ ձեռնարկվում են համապատասխան միջոցներ:

00։10 «Ազատություն» ռադիոկայանի լրագրողներ Կարլեն Ասլանյանը և Հովհաննես Մովսիսյանը հարձակման են ենթարկվել Սարի թաղում տեղի ունեցող ցույցը լուսաբանելու ընթացքում։ «Նրանք ունեին լրարգրողական վկայականներ և լրագրողական սարքավորումներ։ Երկուսն էլ ենթարկվել են բռնության, մահակներով հարվածներ են ստացել քաղաքացիական հագուստով ոստիկանների կողմից։ Նրանք ասել են Հովհաննեսին՝ էդ նկարում ես, հա։ Մոտեցան և սկսեցին հարվածել, ջարդեցին տեխնիկան։ Սարսափելի է։ Ինչպես հաղորդում են Հովհաննեսը և Կարլենը ոստիկանները պոկել են լրագրողական վկայականները։ Ծեծի են ենթարկել նաև ցուցարարներին։ Սարսափելի է ուղղակի»,- ֆեյսբուքյան իր էջում գրել է ռադիոկայանի մեկնաբան Հրայր Թամրազյանը։

Բռնության են ենթարկվել նաև «Ա1+» լրատվամաիջոցի լրագրողները, այս մասին գրում է լևատվամիջոցի խմբագիրներից Հասմիկ Բուդաղյանը․ «Ուղիղ եթերում բռնության ենթարկվեց նաև Ա1+-ի անձնակազմը»։

Իրավաբան․net