Ֆրանսիայի Արտաքին գործերի նախարարությունը խորհուրդ է տալիս իր քաղաքացիներին հրաժարվել Ռուսաստան մեկնելուց՝ զարգացող իրադարձությունների ֆոնին, ասվում է Ֆրանսիայի ԱԳՆ կայքում հրապարակված հաղորդագրության մեջ։ Գրում է РИА Новости-ն։
«Հաշվի առնելով ծայրահեղ անկայուն ռազմական և անվտանգային իրավիճակը, ինչպես նաև Մոսկվայում և Ռուսաստանի որոշ շրջաններում հակաահաբեկչական գործողության ռեժիմ մտցնելու որոշումը՝ այդ երկիր ցանկացած ճանապարհորդություն պաշտոնապես անցանկալի է»,- ասվում է տեքստում։
Ավելի վաղ Ֆրանսիայի ԱԳՆ-ն հայտնել էր, որ նախարարությունն ուշադիր հետևում է Ռուսաստանում տեղի ունեցող իրադարձություններին, Ֆրանսիան պատրաստ է ապահովել Ռուսաստանում իր քաղաքացիների անվտանգությունը, ԱԳՆ-ն սերտ կապի մեջ է G7-ի գործընկերների հետ։
Ինչպես արդեն հայտնել ենք, այսօր՝ հունիսի 24-ի վաղ առավոտյան, Դոնի Ռոստովի կենտրոնում տանկեր են հայտնվել․ դրանք «Վագներ» ռազմական խմբավորման անդամներ են։ «Վագներ»-ի հիմնադիր Եվգենի Պրիգոժինը հայտարարել է, որ ՌԴ ԶՈՒ-ն ավիահարվածներ է հասցրել իրենց, քանի որ Շոյգուն ու ռազմական ղեկավարությունը ուզում էին իրեն ոչնչացնել` բանակում ու ռազմագոտում առկա խնդիրները բարձրաձայնելու համար։
ՌԴ անվտանգության դաշնային ծառայությունից հայտնել են, որ Պրիգոժինի հայտարարություններն ու գործողությունները, ըստ էության, կոչեր են՝ սկսելու զինված քաղաքացիական հակամարտություն Ռուսաստանի Դաշնության տարածքում և կոչ արել հրաժարվել Պրիգոժինի հրամանները կատարելուց, ինչպես նաև նպաստել նրա կալանավորմանը։
Հայտարարությամբ է հանդես եկել նաև ՌԴ նախագահ Վլադիմիր Պուտինը՝ կատարվածը որակելով դավաճանություն և հարված թիկունքից․ «Յուրաքանչյուր ոք, ով միտումնավոր բռնել է դավաճանության ճանապարհը, ով պատրաստել է ռազմական խռովության, բռնել է խռովության և ահաբեկչական մեթոդների ուղին, անխուսափելի պատիժ է կրելու, պատասխան է տալու օրենքի և մեր ժողովրդի առաջ»։
