ՆԱՏՕ-ի Խորհրդարանական վեհաժողովը դաշինքի անդամ երկրների կառավարություններին ու խորհրդարաններին կոչ է արել պաշտոնապես հայտարարել, որ «ներկայիս ռեժիմի օրոք ռուսական պետությունը ահաբեկչական պետություն է»։ Համապատասխան բանաձևն ընդունվել է նոյեմբերի 21-ին, հայտնում է Meduza-ն։

Բանաձևը նաև կոչ է անում կազմակերպել միջազգային տրիբունալ՝ Ուկրաինայում Ռուսաստանի ռազմական հանցագործությունները հետաքննելու համար:

Նմանատիպ բանաձև, որը կոչ է անում Ռուսաստանին «ահաբեկչական պետություն» հռչակել, հոկտեմբերին ընդունել է Եվրախորհրդի խորհրդարանական վեհաժողովը։

Տարբեր ձևակերպումներով Ռուսաստանում քաղաքական ռեժիմը Էստոնիայի, Լատվիայի, Լիտվայի, Լեհաստանի, Չեխիայի խորհրդարաններն արդեն անվանել են ահաբեկչական։

Հիշեցնենք, որ ռուս-ուկրաինական պատերազմը կամ «հատուկ գործողությունը» սկսել է 2022 թվականի փետրվարի 24-ին։

Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր հատվածներում, այդ թվում՝ մայրաքաղաք Կիևի մերձակայքում։

Միևնույն ժամանակ, Դոնեցկի (ԴԺՀ) և Լուգանսկի (ԼԺՀ) ինքնահռչակ հանրապետությունների զինված կազմավորումները սկսեցին ռազմական գործողություններ Ուկրաինայի Զինված ուժերի դեմ Դոնբասի ամբողջ ճակատային գծի երկայնքով և մի շարք վայրերում անցան հարձակման։