Երևան ընդհանուր իրավասության առաջին ատյանի դատավոր Արուսյակ Ալեքսանյանն այսօր՝ հուլիսի 21-ին, ժամը 12:52-ի սահմաններում Դատավորների միությանն անդամակցությունը դադարեցնելու դիմում է ներկայացրել:
Այս մասին Iravaban.net-ին հայտնեց Դատավորների միության մամուլի քարտուղար Էլեն Առաքելյանը:
«Միությանն անդամակցությունը դադարեցնելու պատճառների վարաբերյալ դիմում ոչինչ չի նշվում»,-ասաց նա:
Նշենք որ Արուսյակ Ալեքսանյանը Արմեն Գրիգորյանին կալանավորելու վերաբերյալ որոշում կայացրած դատավորն է եղել:
Հիշեցնենք, որ Երևանի ընդհանուր իրավասության դատարանի Կենտրոնի նստավայրում հուլիսի 15-ին նախնական դատալսումների ժամանակ Արմեն Գրիգորյանը հանկարծ կորցրել է գիտակցությունը և ընկել աթոռից: Կարճ ժամանակ անց հայտնի է դարձել, որ Գրիգորյանը մահացել է:
Մայիսի 17-ին ՀՀ ԱԱԾ-ն հայտնել էր, որ ազգային արժանապատվությունը հրապարակայնորեն նվաստացնելու դեպքի առթիվ հարուցված քրեական գործի շրջանակներում Արմեն Գրիգորյանը Քրեական օրենսգրքի 226-րդ հոդվածի 2-րդ մասով նախատեսված հանցանք կատարելու կասկածանքով ձերբակալվել է, ապա կալանավորվել:
