2020-2022 թվականների ոստիկանության բարեփոխումների ռազմավարությունը անկյունաքարային էր՝ ոստիկանությունում բարեփոխումները ինստիտուցիոնալ հենքի վրա դնելու առումով։ Այս մասին Iravaban.net-ի հետ զրույցում նշեց ՆԳՆ ռազմավարական պլանավորման, քաղաքականության մշակման և մոնիթորինգի վարչության պետ Նատալի Սահակյանը։
Նրա խոսքով՝ հատկապես կարևոր է այն հանգամանքը, որ ոստիկանության բարեփոխումների նոր՝ 2024-2026 թվականների ռազմավարությունը մշակվել է հենց վերոնշյալ փաստաթղթից քաղված դասերի հիման վրա։ Նախորդ ռազմավարությունը, թեպետ համընկավ ժամանակաշրջանով պայմանավորված մի շարք խնդիրների և խոչընդոտների հետ, այնուամենայնիվ մի շարք ուղղություններով, ըստ Սահակյանի, մեծ հաջողություններ է գրանցել։
«Պարեկային ծառայության և օպերատիվ կառավարման կենտրոնների ստեղծումն ու ներդրումը ողջ հանրապետությունում, ինչպես նաև ՆԳՆ-ի ստեղծումը անկյունաքարային նշանակություն ունեցան։ Վերջինս դարձավ ժողովրդավարական հասարակությանը բնորոշ քաղաքացիական վերահսկողություն իրականացնող և քաղաքական պատասխանատվություն կրող գործադիր մարմնի մաս։
Շատ կարևոր էր ոստիկանության գործունեության ոլորտին առնչվող քաղաքականության մշակման և իրականացման գործառույթների հստակ դերաբաշխումը»,- նշեց Նատալի Սահակյանը։
Նոր ռազմավարության մշակման ընթացքում հաշվի են առնվել պետական մարմինների կողմից ներկայացված դիտարկումներն ու առաջարկությունները, ինչպես նաև Հայաստանի Հանրապետության ստանձնած միջազգային պարտավորությունները։
«Նոր ռազմավարությունը ձևավորվել է բավականին համապարփակ և, չեմ վախենա ասել, աննախադեպ ձևաչափով։ Քննարկումները եղել են բավականին ներառական․ կազմակերպվել են մի շարք ֆոկուս-խմբային քննարկումներ՝ ավելի քան երկու տասնյակ հասարակական կազմակերպությունների ներկայացուցիչների մասնակցությամբ, որոնց առաջարկություններն ու դիտարկումները ևս հաշվի են առնվել»,- ասաց Սահակյանը։
ՆԳՆ պաշտոնյան ընդգծեց, որ նոր ռազմավարության առաջնային ուղղություններ են դիտարկվել ՆԳՆ-ի վերջնական կայացումը, ոստիկանության կառուցվածքի և ֆունկցիոնալի ավարտական ձևավորումը, ինչպես նաև արդեն մեկնարկած բարեփոխումների շարունակականության ապահովումը։
«Արդյունավետ և ներառական ոստիկանական բարեփոխումների հանրային վերահսկողություն և իրազեկում» ենթադրամաշնորհը իրականացվում է «Իրավաբանների հայկական ասոցիացիայի» կողմից՝ Եվրոպական միության ֆինանսավորմամբ ընթացող «Հայաստանում արդարադատության ոլորտի բարեփոխումների մշտադիտարկում» ծրագրի շրջանակում՝ «Սոցիալական արդարություն» ՀԿ-ի կողմից հայտարարած դրամաշնորհի ներքո։
Ծրագրի նպատակն է բարձրացնել քաղաքացիական հասարակության մասնակցությունը ոստիկանական բարեփոխումների մոնիթորինգի և ազդեցության գնահատման գործում՝ ապահովելով կառուցվածքային ներգրավման մեխանիզմներ, անկախ գնահատում և հանրային իրազեկվածության բարձրացում։
Այս հոդվածը պատրաստվել է Եվրոպական միության ֆինանսական աջակցությամբ։ Բովանդակության համար պատասխանատվություն է կրում «Իրավաբանների հայկական ասոցիացիա» հասարակական կազմակերպությունը և պարտադիր չէ, որ այն արտահայտի Եվրոպական միության տեսակետները։
