Տիգրան Խաչատրյանի հարազատներն ահազանգում են․ գործարարը ավելի քան 8 ամիս է կալանավորված և պահվում է Ռուսաստանի Դաշնությունում։ Խաչատրյանի դուստրը համոզված է, որ իր հոր դեմ պատվեր է իջեցվել անդրազգային հանցավոր խմբի կողմից, որը շարունակում է ահաբեկել իրենց ընտանիքը՝ շորթում կատարելու մտադրությամբ։

Ըստ նրա՝ ՌԴ-ում քննվող գործը հիմնված է երկու գաղտնի վկաների ցուցմունքների վրա, որոնց ինքնությունը հայտնի է Խաչատրյաններին։ Գաղտնի վկաներից մեկը, ըստ Մարինա Խաչատրյանի, իր մոր մանկության ընկերուհին է, ով որոշ ժամանակ անգամ իրենց տանն է բնակվել։

«Նա մեծ դեր է խաղացել այս ամբողջ գործընթացում։ Երբ հորս ձերբակալել էին, տարբեր տեղերից մարդիկ գալիս ու ասում էին, թե ինչ ուրախությամբ է տարածում այդ տեսանյութը, որը գցել էին տարբեր ռուսական ԶԼՄ-ներ»,- պատմում է Մարինան։

Այս գաղտնի վկայի հետ կապը Խաչատրյաններն ընդհատել էին ՌԴ-ում տեղի ունեցած իրադարձություններից առաջ։ Նրանց հայտնի էր դարձել, որ նշված կինը իրենց պատկանող գույքերը գրավադրել է՝ իրենց համար անհայտ պայմաններում։ Այդ մասին նրանք ավելի ուշ են իմացել և պարտավորեցրել նրան հանել գրավադրված գույքերը։

Մարինա Խաչատրյանը նշում է, որ հոր ձերբակալությունից հետո հանդիպել է նրան մթերային խանութում։ Կինը փորձել է մոտենալ Մարինային ու խոսել նրա հետ, սակայն վերջինս շրջվել և հեռացել է։

«Նա փորձում էր ինձ բարևել, մոտենալ, խոսել, բայց ես այդ ամենը հիշելով՝ գլուխս թեքեցի ու խանութից դուրս եկա։ Նա տեսավ, որ ես շատ լարված եմ իր հանդեպ։ Դրանից հետո սկսեց լուրեր տարածել, թե իբր իր մեքենան հրկիզել եմ ես»,- նշում է Մարինան։

«Մեքենայի հրկիզման հետ կապված քրեական վարույթը զուգորդված է եղել շորթման դեպքին, և մտավախություն ունենք, որ տվյալ հրկիզումը արհեստածին է կամ կատարվել է այլ անձանց կողմից՝ այլ նպատակով»,- ասում է փաստաբան Աշոտ Սիմոնյանը։

Քրեական վարույթ է նախաձեռնվում, և քննությունը պարզում է, որ Մարինա Խաչատրյանը որևէ առնչություն չունի մեքենայի հրկիզման հետ։ Պարզվում է նաև, որ այս ամենը կապված է ՌԴ-ում քննվող գործի հետ․ «Ձեռագիրը պարզ էր։ Այս ամենը կազմակերպել էին, որպեսզի ինձ այստեղ ճնշեին, ինձ վրա քրեական գործ հարուցեին, և այդ ճնշումների ներքո մեր ընտանիքը թուլանար ու կատարեր նրանց պահանջները»։

Մարինա Խաչատրյանը տեղեկացել է, որ հրկիզված մեքենան գրավադրված էր գաղտնի վկայի կողմից։ Ֆինանսական խնդիրները նրան հասցրել էին նրան, որ դատարանի կողմից ճանաչվել է սնանկ։ Նա նախօրոք տեղյակ էր, որ կորցնելու է մեքենան։ Տիգրան Խաչատրյանի դուստրը վստահ չէ, սակայն ունի հիմնավոր կասկածներ, որ մեքենան հենց այդ կնոջ կողմից էր հրկիզվել։

Երբ Խաչատրյանների հետ հարաբերությունները սառել են, գաղտնի վկան սկսել է ավելի սերտ համագործակցել անդրազգային հանցավոր խմբի անդամների հետ, որի կազմակերպիչը ընտանիքի բարեկամներից է։ Նա և Տիգրան Խաչատրյանը միասին բիզնես գործունեություն են ծավալել։

Խաչատրյանների ընտանիքը և նրանց փաստաբանները մեկ անգամ չէ, որ դիմել են քննչական մարմիններին՝ խնդրելով հրկիզման և շորթման դեպքերի մասով քննություն իրականացնել, սակայն վարույթներում որևէ առաջընթաց չի գրանցվել։

«Ֆինանսական պահանջներ են առաջացել, հայրս չի համաձայնել, ասել է՝ դիմիր դատարան, ընտրիր օրինական ճանապարհը։ Բայց նա չընտրեց այդ ճանապարհը․ շինծու գործ սարքելով հորս գլխին՝ ցանկանում է մեզ վրա ճնշում գործադրել։ Միջնորդավորված մարդկանց են ուղարկել մեր տուն, հաղորդագրություններ են փոխանցել։ Մի անգամ մեր ծանոթներից մեկը եկավ, իր հետ առանց քարտ հեռախոս էր բերել և ականջակալներ։ Ասաց, որ գալիս է այդ անձնավորության կողմից առաջարկով, բայց պահանջ կա, որ պետք է խոսենք միայն ականջակալով ու այդ հեռախոսով։ Այսինքն՝ այնտեղից հնչեցվելու էր մի առաջարկ, որը մեզնից բացի ոչ ոք չպետք է լսեր։ Այդ առաջարկները տարբեր ձևերով գալիս են․ «Փողը տվեք՝ հորդ հարցը կլուծվի»։ Եթե չտաք, հայրդ կմնա այնտեղ, կնստի 15-20 տարի, կուղարկեն Սիբիր։ Մի արտահայտություն էլ է լավ տպավորվել․ «Գրուզ-200»-ով հետ կգա տուն»,- պատմում է Մարինան։

Կին գաղտնի վկան նախօրոք հայտնել է, որ գնում է Մոսկվա և ցուցմունք է տալու ընդդեմ Տիգրան Խաչատրյանի։

Մարինան պնդում է, որ սպառնալիքները սաստկացել են և շարունակական բնույթ են կրում։ Իրավապահ մարմիններին այս ամենի մասին հայտնի է, սակայն Խաչատրյանների ընտանիքը պնդում է, որ նրանց կողմից որևէ գործողություն չի ձեռնարկվում։

Ընտանիքը Տիգրան Խաչատրյանի հետ այս 8 ամիսների ընթացքում կարողանում է շփվել միայն փաստաբանի միջոցով․ «Հայրս ասում է, որ ոչինչ չի արել ու վստահ է, որ արդարություն լինելու է։ Մենք այդ հույսով էլ ապրում ենք»։

Մանրամասները՝ տեսանյութում։