Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածու, փաստաբան Հայկ Ալումյանը հարցազրույցի փուլի ժամանակ այն հարցին, թե արդյո՞ք Սահմանադրության մեջ նշելը, որ Հայ առաքելական եկեղեցին առանձնահատուկ դեր ունի, խտրական է իր էությամբ, թե՞ ոչ՝ հաշվի առնելով, որ Հայաստանում կան կրոնական այլ կազմակերպություններ, պատասխանեց, որ խտրականություն է, երբ ինչ-որ մի անձի կամ խմբի տրվում է լրացուցիչ արտոնություն։

«Սակայն, արտոնություն տալը կամ իրավունքից զրկելը միշտ չէ խտրականություն, եթե այն ունի որոշակի հիմնավորում։ Նախ պետք է հասկանալ, այդ հոդվածը, որ Սահմանադրության մեջ կա, ինչ-որ գործնական առավելություն տալիս է Հայ առաքելական եկեղեցուն մյուս կրոնական կազմակերպությունների նկատմամբ, թե՞ ոչ։ Եթե դա այդպես է, ապա պետք է պարզել՝ ինչով է պայմանավորված դա, եթե ոչ, ապա հարցն այլևս չի քննարկվում։ Եթե հարցին դրական պատասխան է տրվում, ապա գործ ունենք խտրականության հետ»,-ասաց նա։

Ճշտող հարցին, թե որն է այն էական հիմքը, որի դեպքում չի դիտարկվում հարցը խտրականության համատեքստում, Ալումյանն ասաց, որ պատրաստ չէ պատասխանել, թե ինչու է այդ հոդվածը դրվել Սահմանադրության մեջ․ «Սա այն հարցը չէր, որին ես նախօրոք պատրաստվել էի»։