«Սուրմալու» առևտրի կենտրոնի տարածքում, որտեղ երեկ տեղի էր ունեցել հզոր պայթյունը՝ նոր պայթյունի վտանգ չկա։ Այս մասին լրագրողների հետ զրույցում ասաց Արտակարգ իրավիճակների փոխնախարար Դավիթ Համբարյանը։
«Կա լոկալ ճայթյունների, մնացած նյութերի հնարավոր բռնկումների հավանականություն, բայց վտանգ չկա»,-ասաց նա։ Հրդեհաշիջման աշխատանքները կատարելու համար ջրի խնդիր չկա։
Համբարյանի խոսքով՝ կան ցրված նյութեր, որոնք իրենցից մեծ վտանգ այլևս չեն ներկայացնում, բայց դրանք պետք է ամբողջությամբ հրդեհաշիջվեն, հովացման տևական աշխատանք պետք է իրականացվի։
«Չեմ կարող ասել՝ ինչքան կտևի։ Իրավիճակը հսկողության տակ է, աշխատանքները շարունակվելու են այնքան, մինչև հետևանքներն ու լոկալիզացիան ամբողջությամբ իրականացվի»,-ասաց Դավիթ Համբարյանը։
Նրա խոսքով՝ աշխատանքները ձեռքով են կատարվում նաև, քանի որ հավանականություն կա, որ ողջ մնացած մարդիկ կան։
«Բազմիցս լռության րոպեներ են արվել, թե՛ գիշերը, թե՛ առավոտյան»,-նշեց Համբարյանը։
Փոխնախարարի խոսքով՝ պատճառների մասին եզրակացություն կտա հետաքննող խումբը և այժմ պատճառների մասին խոսելը վաղ է․ «Գործ ունենք գերհրավտանգ նյութերի հետ, որոնք ամբարված են եղել պահեստներում։ Հրդեհը տեղի է ունեցել, ըստ էության, պահեստային հատվածներում։ Այս պահին վաղ է գնահատական տալ, թե ինչ չափով հրավտանգ նյութերի մասին է խոսքը, բայց հետաքննությունն այդ հարցերի պատասխանը կտա»։
Նա նաև նշեց, որ տարածքի մուտքը սահմանափակված է, միայն հատուկ փրկարարական, ոստիկանական ուժերն են այդտեղ ու հարակից խանութներն էլ փակ կմնան այնքան ժամանակ, մինչև աշխատանքներն ամբողջությամբ ավարտվեն։
Դավիթ Համբարյանն ընդգծեց, որ կամավորների, սրտացավ մարդկանց թիվը շատ է, բայց փրկարարական աշխատանքներում պետք է ներգրավվեն նրանք, որոնք որոշակի փորձառություն ունեն։ Խոսքը թե՛ ֆիզիկական, թե՛ հոգեբանական պատրաստության մասին է։ Նա նաև շնորհակալություն հայտնեց կամավորներին՝ հայտնելով, որ անհրաժեշտության դեպքում կդիմեն քաղաքացիներին, սակայն դրա կարիքն այժմ չկա։
———————
Հիշեցնենք, որ երեկ՝ օգոստոսի 14-ին, «Սուրմալու» առևտրի կենտրոնի տարածքում տեղի է ունեցել պայթյուն՝ հրդեհի բռնկմամբ և փլուզումով․ մասնակի փլուզվել է եռհարկանի շինություն․ փլատակներն ընդգրկում են 8000-9000 քմ տարածք։
Հայտարարվել է հրդեհի բարդության «Թիվ 3» կանչ․ դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից 10 մարտական հաշվարկ։
ԱԻՆ «911» թեժ գծին ստացված զանգերի արդյուքում «Սուրմալու» առևտրի կենտրոնի տարածքում անհետ կորած կարող են համարվել հետևյալ քաղաքացիները՝
- Արամ Հայրապետյան, ծնված 1981 թ․
- Վարդան Քոչարյան, ծնված 1960 թ․
- Մարատ Շահբազյան
- Սիրարփի Խաչատրյան
- Մարիամ Խաչատրյան
- Հարութ Գարաքյան
- Գագիկ Կարապետյան
- Արտավազդ Հայրապետյան
- Էռնա Գրիգորյան, ծնված 1980 թ․
- Հրաչյա Սարգսյան, ծնված 1976 թ․
- Վաչագան Եղոյան, ծնված 2000 թ․
- Վանիկ Ամիրխանյան
- Անահիտ Խալաթյան
- Կսենիա Բադալյան, ծնված 1981 թ․
- Արամ Հարությունյան
- Դավիթ Մխիթարյան
Անհետ կորած քաղաքացիների վերաբերյալ որևէ տեղեկություն ունենալու դեպքում խնդրում ենք զանգահարել «911» թեժ գիծ։
Կա 6 զոհ՝ Անահիտ Մխիթարյան, Միսակ Մարգարյան, Ջեմմա Նազարյան և Գայանե Ավետիսյան. զոհերից երկուսի ինքնությունը պարզված չէ։
Բժշկական կենտրոններ տեղափոխված անձանց թիվն այս պահին 61 է:
Տարբեր կենտրոններում բուժումը շարունակում է 13 տուժած: Նրանց առողջական վիճակը մասնագետները գնահատում են միջին ծանրության:
Մյուս հոսպիտալացվածները ստացել են անհրաժեշտ բուժօգնությունն ու դուրս գրվել։
