Այսօր Շիրակի մարզի ընդհանուր իրավասության դատարանում դատավոր Էդվարդ Մանուկյանի նախագահությամբ կայացավ Էդուարդ Վարժապետյանին, Արթուր Աբրահամյանին, Ռուբեն Մնացականյանին, Կիմա Փիլոյանին առաջադրված մեղադրանքի քննությունը: 

Վերջիններիս նկատմամբ մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով` յուրացնելը կամ վատնելը, 308-րդ հոդվածի 2-րդ մասով՝ պաշտոնեական լիազորությունները չարաշահելը, 325-րդ հոդվածի 1-ին մասով՝ փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը և 38-314 հոդվածներով:

Նշենք, որ ամբաստանյալ Էդուարդ Վարժապետյանը՝  աշխատելով ՀՀ աշխատանքի և սոցիալական հարցերի նախարարության սոցապ պետական ծառայության Գյումրու տարածքային բաժնի պետի պաշտոնում՝ 2007-2009թթ. նույն բաժնի աշխատակիցներ Արթուր Աբրահամյանի, Ռուբեն Մնացականյանի և Կիմա Փիլոյանի հետ, գալով նախնական համաձայնության, պետությունից հափշտակել են առանձնապես խոշոր չափերի կենսաթոշակի գումար՝ 4 միլիոն 337 հազար 835 դրամ: Վերջիններս կատարել են նաև պաշտոնեական կեղծիք՝ յուրացնելով կենսաթոշակները, թաղման նպաստները և ժառանգության գումարները:

Դատական նիստի ընթացքում ամբաստանյալներին հարց տրվեց, թե արդյո՞ք ընդունում են իրենց առաջադրված մեղադրանքը: Էդուարդ Վարժապետյանը ամբողջովին ընդունեց իր մեղքը, Արթուր Աբրահամյանն ընդունեց մասնակի, Կիմա Փիլոյանը հարցի շուրջ որևէ դիրքորոշում չհայտնեց, իսկ Ռուբեն Մնացականյանը իրեն մեղավոր չճանաչեց:

Նիստի ընթացքում հարցաքննվեցին նաև գործով վկաներ:

Վկա` Անահիտ Բարսեղյանը պարզաբանեց, որ մի անգամ է ստացել հոր մահվան նպաստը, մինչդեռ քննիչը գնացել էր վերջինիս բնակարան և ասել, որ նույն գումարը երկու անգամ է ստացել: 

Վկա Ֆրանս Շուխյանն էլ տեղեկացրեց, որ քննիչի վստահեցմամբ և ձեռք բերված ապացույցներով, ինքը կուտակված կենսաթոշակ է ստացել կրկնակի անգամ:
Հաջորդ դատական նիստը կկայանա հուլիսի 23-ին՝ ժամը 12:00-ին:

 Հանրային թղթակից՝ Անահիտ Ալեքսանյան

Իրավաբան.net