Ադրբեջանի նախագահ Իլհամ Ալիևը նամակ է հղել ՌԴ նախագահ Վլադիմիր Պուտինին՝ երկու երկրների միջև դիվանագիտական հարաբերությունների հաստատման 30-ամյակի կապակցությամբ։
«Հարգելի Վլադիմիր Վլադիմիրի,
Սրտանց շնորհավորում եմ Ձեզ և ի դեմս Ձեզ Ռուսաստանի բարեկամ ժողովրդին նշանակալից տարեդարձի՝ Ադրբեջանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 30-ամյակի կապակցությամբ։
Վերջին երեք տասնամյակների ընթացքում ադրբեջանա-ռուսական հարաբերությունները, որոնք հիմնված են մեր ժողովուրդների միջև բարեկամության և բարիդրացիության դարավոր ավանդույթների վրա, հաջողությամբ զարգացել և ամրապնդվել են ռազմավարական գործընկերության և փոխշահավետ համագործակցության ոգով, որը հիմնված է փոխադարձ հարգանքի և վստահության սկզբունքների վրա։
Այսօր մեր միջպետական կապերը, որոնք բնութագրվում են ակտիվ քաղաքական երկխոսությամբ, առևտրատնտեսական, տրանսպորտային, էներգետիկ, հումանիտար և այլ ոլորտներում արդյունավետ համագործակցությամբ, մեծ գոհունակություն են առաջացնում։ Երկկողմ հարաբերությունների դինամիկ զարգացման վառ ապացույցն է փոխադարձ առևտրի և ներդրումների կայուն աճը, ամուր իրավական դաշտը և տարբեր ոլորտներում համատեղ նախագծերի ու նախաձեռնությունների արդյունավետ իրականացումը։
Հատկապես ուրախալի է, որ դիվանագիտական հարաբերությունների հաստատման այս հոբելյանական տարին համընկավ Ադրբեջանի Հանրապետության և Ռուսաստանի Դաշնության միջև դաշնակցային համագործակցության մասին հռչակագրի ստորագրման հետ։ Այս կարևոր փաստաթուղթն ամրագրեց որակապես նոր, ամենաբարձր մակարդակը, որին հասել են մեր պետությունների հարաբերությունները երեսուն տարվա ընթացքում»,-նշվում է Ալիևի ուղերձում։
Ըստ նրա՝ Ադրբեջանի և Ռուսաստանի միջպետական հարաբերությունների կարևոր բաղադրիչը նաև միջտարածաշրջանային համագործակցությունն է։
«Մաղթում եմ Ձեզ, հարգելի Վլադիմիր Վլադիմիրի, քաջ առողջություն, երջանկություն և հաջողություններ, իսկ Ռուսաստանի բարեկամ ժողովրդին՝ բարօրություն և բարգավաճում»,- ասված է շնորհավորանքում։
