Ուկրաինայի նախագահ Վլադիմիր Զելենսկին, ելույթ ունենալով խորհրդարանի անդամների, կառավարության և Իսրայելի ժողովրդի համար՝ ասել է, որ Ուկրաինայի ժողովուրդը Երկրորդ համաշխարհային պատերազմի ժամանակ կատարել է իր ընտրությունը՝ փրկելով հրեաներին, այժմ իսրայելցիներն ունեն նույն ընտրությունը։
«Ուկրաինացիներն իրենց ընտրությունը կատարել են 80 տարի առաջ: Նրանք փրկել են հրեաներին: Իսրայելի ժողովուրդ, այժմ դուք ունեք այդպիսի ընտրություն»,- ասել է Զելենսկին:
Իր ուղերձում նախագահը խոսել է Կիևում Բաբի Յարի վրա ռուսական հրթիռների անկման մասին, որտեղ թաղված են Հոլոքոստի տասնյակ հազարավոր զոհեր, ինչպես նաև Ումանի գնդակոծման մասին, որտեղ իսրայելցիներն ամեն տարի այցելում են Ցադիկ Նաչմանի գերեզման ուխտագնացության համար։
«Ի՞նչ կմնա Ուկրաինայի այս բոլոր քաղաքներից այս սարսափելի պատերազմից հետո: Վստահ եմ, որ իմ կոչի յուրաքանչյուր բառը ցավով է արտացոլվում ձեր սրտերում, որովհետև դուք զգում եք, թե ինչի մասին եմ խոսում: Մենք դիմում ենք ձեզ օգնության համար, տարրական վիզաներ: Ի՞նչ է դա, անտարբերություն, հաշվարկ, թե պարզապես միջնորդություն… Ես միայն մի բան կասեմ՝ անտարբերությունը սպանում է: Հաշվարկները հաճախ սխալ են, իսկ միջնորդությունը կարող է լինել պետությունների, բայց ոչ բարու և չարի միջև»,- ասել է պետության ղեկավարը։
«Իսրայելում բոլորը գիտեն, որ ձեր հակահրթիռային պաշտպանությունը ամենալավն է, ամենահզորը: Բոլորը գիտեն, որ ձեր զենքերն ուժեղ են, որ դուք հիանալի եք: Դուք գիտեք, թե ինչպես պաշտպանել ձեր պետական շահերը, ձեր ժողովրդի շահերը, և դուք կարող եք միանշանակ օգնել մեր ժողովրդին: Հրեաներ, դուք կարող եք երկար ժամանակ հարցնել, թե ինչու մենք չենք կարող զենք ստանալ ձեզնից կամ ինչու Իսրայելը պատժամիջոցներ չի կիրառում Ռուսաստանի դեմ, ինչու չի ճնշում ռուսական բիզնեսը»,- ամփոփել է Զելենսկին։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
