Եվրամիության և Եվրոպական տնտեսական տարածքի մի քանի այլ երկրների նման, Իտալիան նույնպես որոշել է հրաժարվել գունային կոդավորման համակարգից և ավելի քիչ սահմանափակող կանոններ կիրառել երկիր ժամանող անձանց համար:
Իտալիայի առողջապահության նախարարությունն այս ամսվա սկզբին պարզաբանել է, որ պահանջները նույնը կլինեն նաև ոչ ԵՄ երկրներից Իտալիա ժամանողների համար։
Այսինքն՝ բոլոր ժամանողների համար կգործեն նույն կանոնները՝ անկախ նրանից, թե որ երկրից են ժամանում, հայտնում է SchengenVisaInfo.com-ը։
«Առողջապահության նախարար Ռոբերտո Սպերանզան նոր կանոնակարգ է հաստատել, որը մարտի 1-ից սահմանում է ոչ եվրոպական բոլոր երկրներից Իտալիա մուտքի նույն կանոնները, որոնք արդեն իսկ ուժի մեջ են եվրոպական երկրների համար»,- պարզաբանում է Առողջապահության նախարարությունը։
Ըստ այդմ, Իտալիա մուտք գործելու համար, անկախ այն հանգամանքից արդյոք ժամանում են ԵՄ անդամ կամ ԵՄ անդամ չհանդիսացող երկրից, բավարար կլինի Կանաչ անցագրի (Green Pass) առկայությունը՝ պատվաստման, առողջացման կամ թեստավորման վկայական։
Չնայած այն հանգամանքին, որ մուտքը Իտալիա թույլատրվում է այս պայմաններից մեկի առկայության դեպքում, սակայն իշխանությունները ընդգծում են, որ դրանք պետք է համապատասխանեն պատվաստման վկայականի, ապաքինման վկայականի կամ թեստի բացասական արդյունքի վավերականության ժամկետների պահանջներին։
Իտալիան ներկայումս ընդունում է միայն պատվաստումների այն վկայականները, որոնք ապացուցում են, որ ներկայացնողը վերջին ինը ամսվա ընթացքում ստացել է հաստատված պատվաստանյութի չափաբաժիններից մեկը, ինչպես նաև բուստերային պատվաստումը։
Պետք է նշել, որ առողջացման վկայականը մուտքի համար ընդունվում է միայն այն դեպքում, եթե ներկայացնողը վիրուսից վերականգնվել է վերջին վեց ամսվա ընթացքում:
Ինչ վերաբերում է COVID-19 թեստի բացասական արդյունքներին, Իտալիայի իշխանությունները բացատրել են, որ երկիրը մուտքի համար ընդունում է ինչպես PCR, այնպես էլ արագ հակագենային թեստավորման (RAT) արդյունքները: PCR թեստը պետք է կատարված լինի 72 ժամ առաջ:
Ավելի խիստ կանոններ են գործում մինչև Իտալիա հասնելը չպատվաստված և չապաքինված ճանապարհորդների, ինչպես նաև նրանց համար, ովքեր թեստավորում չեն անցել:
Առողջապահության նախարարությունը տեղեկացնում է, որ բոլոր նրանք, ովքեր չեն ներկայացնում վերոնշյալ տեղեկանքներից մեկը՝ պատվաստման, առողջացման կամ թեստավորման վկայական, ժամանելուն պես պետք է ինքնամեկուսացում անցնեն։
«Եվրոպական երկրից Իտալիա մեկնող կամ վերադարձող անձինք, ովքեր չունեն պատվաստման, առողջացման կամ թեստավորման վկայական վավերական կանաչ անձնագիր, պետք է անցնեն հնգօրյա հավատարմագրային ինքնամեկուսացում», – ասված է նախարարության հայտարարության մեջ:
Բոլոր ժամանողները, անկախ պատվաստված կամ վիրուսից վերականգնված լինելու հանգամանքի, նախքան Իտալիա մուտք գործելը պետք է նաև հայտարարագիր լրացնեն:
