Ուկրաինայի Արտաքին գործերի նախարար Դմիտրի Կուլեբան Ռուսաստանի արտգործնախարար Սերգեյ Լավրովի հետ բանակցություններից հետո ասել է, որ Ռուսաստանը ծրագրում է շարունակել իր ագրեսիան այնքան ժամանակ, քանի դեռ Ուկրաինան չի կատարել իր պահանջները, որոնցից մեկը հանձնվելն է։
Այս մասին, ըստ UNIAN-ի թղթակցի, նա ասել է բանակցությունների արդյունքներին հաջորդած մամուլի ասուլիսի ժամանակ։
«Նրանք կշարունակեն իրենց ագրեսիան այնքան ժամանակ, քանի դեռ Ուկրաինան չի բավարարել իրենց պահանջները: Եվ այդ պահանջներից մեկն էլ հանձնվելն է», ասել է Կուլեբան: Նախարարն ընդգծել է, որ նման տարբերակն անընդունելի է Ուկրաինայի համար։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
