«Ես առաջարկ եմ ստացել արտաքին գործերի նախարարությունից՝ քննարկելու Ուկրաինայի և Ռուսաստանի միջև դիվանագիտական հարաբերությունների խզման հարցը։ Անմիջապես ասուլիսից հետո ես կաշխատեմ նաև այս հարցի շուրջ», – ասել է Զելենսկին մամուլի ասուլիսի ժամանակ, փոխանցում է Дождь լրատվական կայքը:
Նա հավելել է, որ ճանաչելով ԴԺՀ-ի և ԼԺՀ-ի անկախությունը, Ռուսաստանը «օրինական հիմքեր է ստեղծում Ուկրաինայի դեմ զինված ագրեսիայի համար՝ միաժամանակ խախտելով բոլոր երկկողմ և բազմակողմ պարտավորությունները», մասնավորապես՝ Ուկրաինայի վերաբերյալ ՄԱԿ-ի Անվտանգության խորհրդի 2015 թվականի փետրվարի 17-ի բանաձևը։
Զելենսկին թույլատրել է Ուկրաինայում ռազմական դրություն մտցնել ռուսական ներխուժման դեպքում՝ նշելով, որ «մենք կարծում ենք, որ պատերազմ չի լինի»։ Նա նաև կոչ է արել արևմտյան երկրներին անհապաղ պատժամիջոցներ կիրառել Ռուսաստանի դեմ, որոնք, ըստ նրա, պետք է ներառեն «Հյուսիսային հոսք 2» գազատարի ամբողջական փակումը:
Նշենք, որ իրավիճակը Դոնբասում վերջին օրերին սրվել է, ԴԺՀ-ն և ԼԺՀ-ն հայտարարել են Ուկրաինայի անվտանգության ուժերի կողմից բազմաթիվ գնդակոծությունների մասին։
Ռուսաստանի նախագահ Վլադիմիր Պուտինը երեկ՝ փետրվարի 21-ին, Կրեմլում հրամանագրեր է ստորագրել, որով ճանաչել է ինքնահռչակ ԴԺՀ-ի և ԼԺՀ-ի անկախությունը: Պուտինն իր հրամանագրերում հանձնարարել է Ռուսաստանի Դաշնության զինված ուժերին ապահովել նշված վայրերում խաղաղությունը:
