Հայաստանը պատրաստ է սկսել սահմանների սահմանազատման և սահմանագծման գործընթացը։ Այս մասին Ռուսաստանի և Ադրբեջանի նախագահների հետ հանդիպման ժամանակ հայտարարեց Հայաստանի վարչապետ Նիկոլ Փաշինյանը։
«Մենք նաև անկեղծորեն շահագրգռված ենք տարածաշրջանում հաղորդակցությունների բացմամբ և ապաշրջափակմամբ», – նշեց նա։
Փաշինյանն ասաց, որ 2021 թվականի մայիսի 12-ից հայ-ադրբեջանական սահմանին ճգնաժամային իրավիճակ է ստեղծվել։
«Մեր գնահատականն այն է, որ ադրբեջանական զորքերը ներխուժել են Հայաստանի ինքնիշխան տարածք։ Իհարկե, սահմանները չեն սահմանազատվում և չեն սահմանագծվում, բայց պետական սահմանը կա և այն Հայաստանի Հանրապետության ինքնիշխան տարածքն է», – ասաց Փաշինյանը։
