Այս շաբաթ եվրոպական մի քանի պետություններ հայտարարեցին արգելափակումներ այն քաղաքացիների համար, ովքեր չեն պատվաստվել կորոնավիրուսային վարակի դեմ։
Այս մասին հայտնում է «ՌԻԱ Նովոստին»։
Առաջինը նման քայլի դիմեցին Ավստրիայի իշխանությունները։ Սահմանափակումները ուժի մեջ են մտել նոյեմբերի 14-ի լույս 15-ի գիշերը։ Այժմ նրանք, ովքեր չունեն պատվաստման վկայական կամ հաստատում, որ վերջին 180 օրվա ընթացքում վարակվել են COVID-19-ով, չեն կարողանա լքել իրենց տները առանց հիմնավոր պատճառի։ Դրանք ներառում են.
– աշխատանքի կամ սովորելու գնալ,
– այցելել բժշկի,
– գնալ խանութ կամ դեղատուն,
– զբոսնել։
Ոստիկանությունը հետևելու է միջոցառումների պահպանմանը։
Մեկ շաբաթ առաջ Ավստրիան նաև արգելեց չպատվաստված քաղաքացիներին այցելել սրճարաններ, ռեստորաններ, վարսավիրանոցներ և ֆիթնես կենտրոններ։
Նրանք, ովքեր արդեն պատվաստվել են առաջին չափաբաժնով, կարող են արգելափակմանը չենթարկվել՝ PCR թեստի առկայության դեպքում: Սահմանափակումները չեն տարածվի մինչև 12 տարեկան երեխաների վրա։
Վիեննան այս որոշումը կայացրել է համաճարակաբանական իրավիճակի վատթարացման ֆոնին։
Նմանատիպ որոշման մասին հայտնել են նաև Չեխիայի իշխանությունները։ Սահմանափակումները ուժի մեջ կմտնեն նոյեմբերի 22-ից և կգործեն մինչև փետրվարի վերջ։
«Նրանք, ովքեր պատվաստված չեն կորոնավիրուսի դեմ կամ չեն հիվանդացել կորոնավիրուսով, չեն կարողանա այցելել խանութներ՝ բացառությամբ սննդի և դեղատների, ռեստորաններ և սննդի այլ օբյեկտներ, կինոթատրոններ, թանգարաններ և մշակութային այլ հաստատություններ, և չեն կարողանա մասնակցել զանգվածային ակցիաներին», – ասել է վարչապետ Անդրեյ Բաբիշը։
Չպատվաստվածների համար արգելափակում է մտցվել նաև Սլովակիայում։ Ինչպես Չեխիայում, միջոցները ուժի մեջ կմտնեն նոյեմբերի 22-ից։
Ինչպես նշել է վարչապետ Էդուարդ Հեգերը, Սլովակիան այս քայլին գնացել է իրավիճակի վատթարացման պատճառով։ Նա հավելել է, որ հիվանդանոցները գերբեռնված են, իսկ նոր հիվանդների համար բավարար մահճակալներ չկան։
Կառավարության ղեկավարը կորոնավիրուսն անվանել է «չպատվաստվածների հիվանդություն». Վարակվածների ավելի քան 70 տոկոսը չի պատվաստվել, ասել է նա։
Նշենք, որ ՄԻԵԴ-ը նախօրեին որոշում է կայացրել, որ արգելափակման կիրառումը չի խախտում Մարդու իրավունքների կոնվենցիան։ Դատարանը նման որոշում է կայացրել Ռումինիայի քաղաքացու հայցով, ով պնդել է, որ 52-օրյա կարանտինը, որին ինքը ենթարկվել է, հավասարազոր է ազատազրկման։ Միևնույն ժամանակ, նա ինքն էլ չի վարակվել COVID-19-ով և չի շփվել հիվանդի հետ։
Ստրասբուրգը նշել է, որ ստեղծված իրավիճակը ուղեկցվում է «բացառիկ ու անկանխատեսելի համատեքստով»։ Բացի այդ, ՄԻԵԴ-ն առաջնորդվել է նրանով, որ
– միջոցառումը, ընդհանուր առմամբ, կիրառելի էր նահանգում բոլորի համար.
– դիմումատուն կարող էր լքել տունը օրենքով նշված հիմնավոր պատճառներով.
– նա իշխանությունների կողմից անհատական վերահսկողության չի ենթարկվել, չի պնդել, որ իրեն ստիպել են ապրել նեղ տարածքում, զրկված չի եղել բոլոր սոցիալական շփումներից։
