Նոյեմբերի 20-ին ՀԵԻԱ Գեղարքունիքի մարզային մասնաճյուղում կայացավ «Կոռուպցիոն ռիսկերը կրթության ոլորտում» հերթական հակակոռուպցիոն միջոցառումը` մարզի ՔՀԿ-ների, ԶԼՄ-ների, իրավաբանների և իրավապաշտպանների մասնակցությամբ:
Ողջույնի խոսքով հանդես եկավ ծրագրի ռեգիոնալ փորձագետ Նելլի Հայրապետյանը, անդրադառնալով այս ոլորտում մարզում առկա հիմնախնդիրներին` մասնավորապես, դրամահավաքությանը դպրոցներում, բուհերում ուսանողների ուսման վարձի չափերի անհամապատասխանությունը նրանց ընտանեկան բյուջեին, ուսուցիչներին տրվող տրանսպորտային ծախսերի անհասանելիությունը և այլն:
«Ծխանի ծուխ» ՀԿ-ի նախագահ ՔՀԿ-ների հակակոռուպցիոն կոալիցիայի Գեղարքունիքի մարզի խմբի անդամ Անուշ Շահինյանը կարևորեց հասարակական վերահսկողությունը այս ոլորտում: Նա շեշտեց, որ հանրային վերահսկողությունը պետք է իրականացնել հատկապես ուսուցիչների և տնօրենների համար երեք տարին մեկ սահմանվող հանձնաժողովներում, որտեղ կոռուպցիոն ռիսկը առկա է:
Բուհերում պետք է փոխվի ուսանողների կրթություն ստանալու մոտիվացիան, ուսանողների մի զգալի մասը պետք է գիտակցի, որ ուսումնական քննությունները հանձնում են գիտելիքների ձեռք բերման նպատակով, ոչ թե այընտրանքային տարբեր ճանապարհներով:
«Բարեկամություն ազգերի փոքրամասնություն» ՀԿ-ի նախագահ Սիրանուշ Մանուկյանն անդրադարձավ գրքերի շրջանառության հետ կապված կոռուպցիոն ռիսկերին:
Ընդհանուր քննարկումների արդյունքում մասնակիցների կողմից արվեցին առաջարկություններ:
Ըստ նրանց` հարկավոր է իրականացնել դպրոցներում մոնիտորինգներ` աշակերտների և ուսուցիչների շրջանակներում` դրամահավաքության հետ կապված ու վերանայել բուհական համակարգում ուսանողների ուսման վարձերի չափերը: Վերջում մասնակիցները գոհունակություն հայտնեցին միջոցառման կազմակերպիչներից:
