Բաղրամյան պողոտայում քիչ առաջ շրջայց է կատարել ՀՀ ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանը: Նա Բաղրամյանում էր, որպեսզի խոսեր անչափահասների հետ և հորդորի նրանց ծնողներին, որ անչափահաս երեխաներին իրենց հետ ցույցի չտանեն: Նելլի Դուրյանը պատասխանեց ցուցարարների և լրագրողների հարցերին: Ցուցարարների այն հարցին, թե ինչու՞ նրանք ավելի շուտ չէին գալիս և հետաքրքրվում ցույցին մասնակից անչափահաս երեխաների խնդրով, Նելլի Դուրյանը պատասխանեց, որ ինքը առաջին օրը չէ, որ Բաղրամյանում է: Ցույցի նախորդ օրերին ինքը քաղաքացիական հագուստով է եղել, այդ պատճառով ցուցարարները չեն ճանչել: Ինչպես նաև, նրա խոսքով, տվյալ ստորաբաժանման աշխատակիցները ցույցի առաջին իսկ օրից աշխատանքներ են կատարել:
Նելլի Դուրյանը չկարողացավ նաև պատասխանել այն հարցին, թե ինչու՞ են հունիսի 23-ին մորն ու անչափահաս 11 տարեկան երեխային տարել ոստիկանության տարբեր բաժիններ: Նա միայն ասաց, որ վաղը զանգահարելու դեպքում, կստանան պատասխան:
Դուրյանի խոսքով եղանակը երեխաների համար արդեն իսկ անբարենպաստ է, ինչպես նաև նրանք չպետք է ուշ ժամի լինեն փողոցում: Մինչդեռ ցուցարարները վստահեցնում էին, որ ծնողների կողմից երեխաներին որևիցե վտանգ չի սպառնում, նրանք ևս կարող են մասնակցել ցույցին: Նրանց մի մասն էլ գտնում է, որ ոստիկանությունը եկել է երեխաներին հենց ոստիկանությունից պաշտպանելու համար:
Նելլի Դուրյանը շրջեց Բաղրամյանում, բայց չմոտեցավ և չխոսեց անչափահասների հետ, ինչի համար, որ եկել էր:
