Իրավաբան.net–ի թղթակիցը հայտնում է, որ քիչ առաջ «Արմենիա» բժշկական կենտրոնից դուրս եկան ՀՀ առողջապահության նախարար Արմեն Մուրադյանն ու Պերինատոլոգիայի, մանկաբարձության եւ գինեկոլոգիայի կենտրոնի ղեկավար Ռազմիկ Աբրահամյանը: Նրանք երկուսն էլ վիրահատարանում էին, որտեղ այս պահին վիրահատվում է ծանր հրազենային վնասվածք ստացած 28-ամյա Մելինե Ասատրյանը:
Նախարարն ու կենտրոնի ղեկավարը հրաժարվեցին պատրասխանել լրագրողների հարցերին: Աղջկա հարազատներն ու Ռազմիկ Աբրահամյանն էլ խնդրեցին, որ լրագրողներն իրենց հաղորդումները չգերադասեն մարդկանց խնդիրներից:
Զրույցի ժամանակ, երբ աղջկա հորը հարց տվեցին, թե այդ երիտասարդ ընտանիքն ի՞նչ խնդիր է ունեցել, հայրը բացասաբար շարժեց գլուխը. «Ոչ մի խնդիր չունեին»:
Հիշեցնենք, որ այսօր առավոտյան Հանրապետական հիվանդանոցի ծննդատանը 33-ամյա տղամարդը հենց հիվանդասենյակում կրակել է կնոջ վրա, այնուհետև ինքնասպան եղել:
Հայտնի է նաև, որ երեք հրազենային վնասվածք է ստացել Մելինեն` պարանոցային և ուսային հատվածում:
Նշենք նաև, որ դեպքի վայր համարվող 407 սենյակն այս պահին նախաքննական մարմնի կողմից փակված և կնքված է, քիչ առաջ այնտեղից դուրս է բերվել կնոջ վրա կրակած և ինքնասպան եղած տղամարդու մարմինը:
