.png)
Ինչպես արդեն տեղեկացրել է Iravaban.net-ը, Ղազախստանի հայկական համայնքի <<Նաիրի>> ասոցիացիայի նախագահ Արտյուշա Կարապետյանի կողմից <<Հայկական Ժամանակ>> օրաթերթի լրագրող Թագուհի Հովհաննիսյանի լրագրողական գործունեությունը խոչնդոտելու վերաբերյալ մամուլի հրապարակումները Կենտրոն և Նորք-Մարաշ վարչական շրջանների դատախազությունից ուղարկվել է ՀՀ ոստիկանության Երևան քաղաքի վարչության Կենտրոնական բաժին՝ ՀՀ քր. դատ. օր-ի 180 և 181-րդ հոդվածներով սահմանված կարգով նյութեր նախապատրաստելու և հետագա ընթացքը լուծելու ցուցումով:
ՀՀ ոստիկանության Երևան քաղաքի վարչության Կենտրոնական բաժնի կողմից <<Հայկական ժամանակ>> օրաթերթի լրագրող Թ.Հովհաննիսյանը հրավիրվել է ոստիկանություն, որտեղ վերջինս հաղորդում է ներկայացրել և տվել է բացատրություն դեպքի հանգամանքների վերաբերյալ:
Նյութերի նախապատրաստման ընթացքում Սփյուռքի նախարարությունից հարցում է կատարվել` Ա. Կարապետյանի` Հայաստանում գտնվելու վայրի վերաբերյալ տեղեկություններ պարզելու նպատակով, որին ի պատասխան, պարզվել է, որ Ա.Կարապետյանը փառատոնին մասնակցելուց հետո մեկնել է ՀՀ-ից: Միաժամանակ, հարցում է կատարվել ՀՀ ոստիկանության Քրեական հետախուզության գլխավոր վարչություն՝ պարզելու Ա.Հայրապետյանը հատել է ՀՀ սահմանը, թե ոչ:
Այս կապակցությամբ ՀՀ դատախազությունը վերահաստատում է, որ հետևողական է ԶԼՄ-ների ներկայացուցիչների աշխատանքը խոչնդոտելու վերաբերյալ տեղեկությունների լիարժեք և համակողմանի ուսումնասիրման և ճշգրիտ իրավական գնահատական տալու հարցում:
