Ռուբեն Վարդանյանը վերջին կես տարում անսահման թվով նամակներ է ուղարկել, բայց ոչ մեկը չի հասել հասցեատիրոջը, RTV հեռուստաալիքին տված հարցազրույցում ասել է նրա որդին՝ Դավիթ Վարդանյանը։
Նա հավելել է, որ Ռուբեն Վարդանյանին տեսակցելու փաստաբանների բոլոր դիմումները «կամ ուղղակի անտեսվել են, կամ մերժվել»։ «Անկախ բժիշկները» ևս չեն կարողանում այցելել Արցախի նախկին պետնախարարին:
Ընտանիքի վարձած փաստաբանները չեն կարողանում տեսակցել Ադրբեջանում ավելի քան մեկ տարի կալանքի տակ գտնվող Վարդանյանին։
Հացադուլից հետո միայն պետական հիվանդանոցի բժիշկներն են զննել նրան։ Նամակ հնարավոր է ուղարկել միայն Կարմիր խաչի միջոցով, որը շատ կոշտ կանոնակարգ ունի` առավելագույնը 4 էջ․«Նրանք (Կարմիր խաչը) աշխատում են այնպես, ինչպես կարող են, բայց նրանց ձեռքերը նույնպես շատ կապված են այնտեղ: Ինչպես ինձ ասաց հայրս, վերջին վեց ամսվա ընթացքում նա արդեն անսահմանափակ թվով նամակներ է ուղարկել։ Դրանցից ոչ մեկը հասցեատիրոջը չի հասել, այսինքն՝ մեզ մոտ էլ է այս կապի մեթոդը կտրված»,- ասել է Դավիթ Վարդանյանը։
Դավիթը կարողանում է հեռախոսով խոսել հոր հետ, բայց չեն կարողանում ինչ-որ հարցեր քննարկել։
Ընտանիքը երախտապարտ է տեղի փաստաբանին, որը վտանգում է իր կյանքը։
