Հայաստանում դեղատներում անօրինական ներկրված և կեղծ դեղեր վաճառելու համար տուգանքի չափերը կբարձրանան, կարող է ընդհուպ լիցենզիան ժամանակավոր կասեցվել:
Iravaban.net-ը հայտնում է, որ օրենքն ուժի մեջ է մտնում մարտի 6-ին։
Օրենքի նախագիծն ԱԺ նիստում ներկայացրել էր պատգամավոր Նարեկ Զեյնալյանը․ «Նախագծով նախատեսվում է Առողջապահական և աշխատանքի տեսչական մարմնին տալ հավելյալ գործիք՝ դեղերի շրջանառության ոլորտում վերահսկողությունն ավելի արդյունավետ իրականացնելու համար: Տեսչական մարմնին իրավունք է տրվում ստուգումների շրջանակում իրականացնել հսկիչ գնում, որն ուղղված է դեղատներում վաճառվող, ՀՀ-ում անօրինական ներկրված և կեղծ դեղերը հայտնաբերելուն»,-փետրվարի 9-ի նիստում հայտնել էր Զեյնալյանը:
Տուգանքները խստացվել են։
Մինչև 5 փաթեթ նմանատիպ դեղորայք հայտնաբերելու դեպքում տուգանքը սահմանվում է նվազագույն աշխատավարձի 1000-ապատիկի չափով, 5 փաթեթից ավելիի դեպքում՝ 2000-ապատիկի չափով, 1 տարվա ընթացքում նույն խախտումը կրկին հայտնաբերելու դեպքում նախատեսվում է լիցենզիայի գործունեության կասեցում մինչև 2 ամիս ժամկետով:
