Ուկրաինայի նախագահ Վլադիմիր Զելենսկին իր հրամանագրով կատարել է երկրի Ազգային անվտանգության և պաշտպանության խորհրդի որոշումները՝ ի պատասխան ուկրաինական տարածքները բռնակցելու Ռուսաստանի փորձին։
Փաստաթղթում, մասնավորապես, նշվում է «ՌԴ նախագահ Վլադիմիր Պուտինի հետ բանակցությունների անհնարինությունը»։
Հրամանագրով հաստատվում է նաև Ուկրաինայի՝ ՆԱՏՕ-ին ուղղված դիմումը՝ արագացված կարգով դաշինքին միանալու հայտով։ Փաստաթուղթը հրապարակվել է Ուկրաինայի նախագահի կայքում հոկտեմբերի 4-ին, սակայն թվագրված է սեպտեմբերի 30-ով։
Հիշեցնենք, որ սեպտեմբերի 30-ին Կրեմլում «Ռուսաստանին միանալու» մասին պայմանագրեր են ստորագրվել ինքնահռչակ Դոնեցկի և Լուգանսկի Ժողովրդական Հանրապետությունների և Ուկրաինայի Զապորոժյեի և Խերսոնի շրջանների օկուպացված հատվածների հետ։ Նույն օրը Ուկրաինայի իշխանությունները ՆԱՏՕ-ին անդամակցելու հայտ են ներկայացրել։
Զելենսկին միաժամանակ ասել է, որ պատրաստ է Ռուսաստանի հետ երկխոսության, բայց այլ նախագահի հետ։
