Ռուսական զորքերը Ուկրաինայի մայրաքաղաք Կիևի կենտրոնից 20 կմ հեռավորության վրա են՝ Դնեպր գետի ձախ կողմում, սակայն պարզ չէ, թե ինչպես են նրանք պատրաստվում գրոհել 3,5 մլն բնակչություն ունեցող քաղաքը: «Արմենպրես»-ի թղթակցի հաղորդմամբ՝ այդ մասին Ուկրաինայի դեսպանատանը տեղի ունեցած մամուլի ասուլիսում լրագրողներին հայտնեց Հայաստանում Ուկրաինայի գործերի ժամանակավոր հավատարմատար Դենիս Ավտոնոմովը:
«Նրանք մի քանի անգամ փորձել են շրջափակել քաղաքը: Որքան ես գիտեմ՝ պատերազմ վարելու ժամանակակից մեթոդները չեն տրամադրում 3,5 մլն բնակչությամբ, իսկ կուտակումով՝ 8-10 մլն բնակչություն ունեցող քաղաքը գրավելու ալգորիթմներ: Բոլորի համար առեղծված է, թե ինչպես են նրանք պատրաստվում գրոհել Կիևը: Ի սկզբանե նրանք չէին նախատեսել գրոհել մեծ քաղաքները՝ Կիևը և շրջանային կենտրոնները», – այսպես նկարագրեց իրավիճակը ուկրաինացի դիվանագետը:
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
