Զելենսկին ասում է, որ դիմել են ՄԱԿ-ի Միջազգային դատարան: Պարզաբանելու համար` ոչ Ռուսաստանը, ոչ Ուկրաինան ԱՄԴ պարտադիր իրավազորությունն ընդունող հայտարարություն չեն արել (այդպիսի հայտարարություններ արած պետությունների սպառիչ ցանկն այստեղ` https://www.icj-cij.org/en/declarations): Այս մասին հայտնում է միջազգային իրավունքի մասնագետ, ի.գ.թ. Լևոն Գևորգյանը։

«Սա նշանակում է, որ հայցը չի կարող լինել ուժի գործադրման մասին per se (խմբ․-ինքն իրենով). դրա համար չկա վեճը դատարան տանելու համար անհրաժեշտ պայմանագրային հիմք: Ստացվում է (ինչպես կարելի է ենթադրել գրառումից), որ հայցը ներկայացված է Ցեղասպանության կոնվենցիայի հիման վրա` պահանջելով ՌԴ կողմից հնչեցված գնահատականների հերքում (?): Եթե դա այդպես է, ապա սա շատ հետաքրքիր էքսպերիմենտալ քայլ է… կասկածելի իր հեռանկարների առումով, բայց հետաքրքիր… Սպասենք մեկ-երկու օր և տեսնենք…»,-նշել է նա։

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։