Երեկ ստոմատոլոգները, այսօր էլ ռիելթորները:

Այսօր ՀՀ ֆինանսների նախարարության շենքի դիմաց տեղի է ունեցել բողոքի ակցիա «Ո՞վ է 60.000-ի «նկարիչը»» և «Ետ տվե՛ք մեր աշխատատեղերը» կոչերով:

Այն կրկին ուղղված է եղել «Արտոնագրային վճարների մասին» ՀՀ օրենքում փոփոխություններ և լրացումներ կատարելու մասին ՀՀ օրենքին, որն իսկապես մեծ խուճապ է առաջացրել ռիելթորների շրջանում:

Վերջիններս հայտարարում են, որ օրենքի կիրառմամբ անշարժ գույքի ոլորտը կանգնելու է բազմաթիվ խնդիրների առջև՝ ընդհուպ մինչև աշխատատեղերի կրճատում, որոշ ընկերությունների գործունեության դադարեցում և այլն:

Ակցիային մասնակցել են ոլորտի տասնյակ ընկերությունների ներկայացուցիչներ, ինչպես նաև արդեն իսկ օրենքի կիրառման արդյունքում կրճատված աշխատակիցներ:

Հավաքի մասնակիցները պահանջում էին հանդիպում նախարարի հետ և նամակի հանձնում՝ խնդրի պարզաբանման նկատառումներով:

«Եթե պետությունը գրիչի մի հարվածով այսքան մարդու թողնում է առանց աշխատանքի, ի՞նչ անեմ այս պետությունում», -այս մասին Իրավաբան.net-ին հայտնեց Աննա Անանյանը, ով արդեն մնացել է առանց աշխատանքի, իսկ Էդգար Հարությունյանը հայտարարեց, որ «ամեն ինչ վաճառում ենք և գնանք»:

Իսկապես, մեզ իրավաբաններիս համար դժվար է կռահել այս հանելուկը, թե օրենքի հիմքում ինչ հետազոտություն, ուսումնասիրություն է ընկած, կամ՝ ինչ տրամաբանությամբ «հավաքարարին» պետք է դիտել որպես «անշարժ գույքի գործակալ»:

Միգուցե՞ այս հանելուկն ունի իր պատասխանը:

Աղբյուր՝ Իրավաբան.net