ՀՀ գյուղատնտեսության նախարարության սննդի անվտանգության պետական ծառայության տեսուչն Արարատի մարզի Արարատ քաղաքի «Արարատ» անվամբ խանութում վաճառվող ադրբեջանական արտադրության «Best cherry» անվանմամբ կոնֆետ չի հայտնաբերել: Այսօր այս մասին Իրավաբան.net-ի լրագրողին հայտնեց ծառայության հասարակայնության հետ կապերի բաժնի պետ Բաբկեն Պիպոյանը:
Երեկ Իրավաբան.net-ը հրապարակել էր նյութ, որ «Արարատ» խանութում վաճառքի է դրված եղել ադրբեջանական արտադրության կոնֆետ, իսկ Իրավաբան.net- իր լրագրողին խանութի սեփականատերը հայտնել էր, թե ինքը մեկնել է Վրաստան ավտոմեքենա գնելու եւ իր հետ բերել է նաեւ 5 կիլոգրամ կոնֆետ, որը խանութում վաճառում է: Նրա խոսքով` սահմանում որեւէ խնդիր չի առաջացել:
Հիշեցնենք, որ Հայաստանի Հանրապետության գյուղատնտեսության նախարարության «ՀՀ գյուղատնտեսության նախարարի 2009 թվականի սեպտեմբերի 25-ի N 220-Ա հրամանում փոփոխություն եւ լրացում կատարելու մասին» 27 մայիսի, 2011թ. N 87-Ա հրամանով ժամանակավորապես արգելվել է թուրքական եւ ադրբեջանական ծագում ունեցող կենդանական եւ բուսական հումքի ու մթերքի Հայաստանի Հանրապետության տարածք ներկրումը:
Աղբյուրը` Իրավաբան.net
