Երևանում գործող ևս մեկ հասարակական կազմակերպությունն իր նոր կանոնադրությունը գրանցեց իրավաբանական անձանց պետական ռեգիստրում:
«Կառուցողական երկխոսության հանձնառություն» ծրագրի իրավաբան Արմինե Չախալյանի օգնությամբ «Արազա» բարեգործական ՀԿ-ի կանոնադրությունը վերանայվել է, այնուհետև այն գրանցվել է իրավաբանական անձանց պետռեգիստրում:
Նշենք, որ «Հասարակական կազմակերպությունների մասին» նոր օրենքի ընդունումից հետո գրեթե բոլոր ՀԿ-ները պետք է իրենց կանոնադրությունը վերանայեն և համապատասխանեցնեն օրենքի պահանջներին:
«Կանոնադրության վերանայման գործընթացը շատ արագ և արդյունավետ եղավ: Պետական ռեսգիտորում գրանցման հետ կապված տեխնիկական փոքր խնդիրներ եղան, որոնք կապված չէին մեր արած աշխատանքի հետ, այլ պետական ռեգիստրում ոչ վերջնական հաստատված ձևաթղթերով»,- ասաց «Արազա» բարեգործական ՀԿ նախագահ Թամարա Աբրահամյանը:
Նշենք, որ նոր օրենքի վերաբերյալ դասընթացներն ու ՀԿ-ների անվճար իրավաբանական օգնությունը տրամադրվում է ԵՄ-ի կողմից ֆինանսավորվող «Կառուցողական երկխոսության հանձնառություն» ծրագրի շրջանակում:
Հիշեցնենք, որ «Կառուցողական երկխոսության հանձնառություն» ծրագիրն իրականացվում է Եվրոպական Միության ֆինանսական աջակցությամբ` «Իրավաբանների հայկական ասոցիացիա» ՀԿ-ի կողմից` գործընկերներ` «Ագորա Սենթրլ Յուրոփ» ՀԿ-ն (Չեխիա), Ժողովրդավարական կրթության հայկական կենտրոնի (ՍԻՎԻՏԱՍ), Մարդկային զարգացման միջազգային կենտրոնի, ՓՄՁ համագործակցության ասոցիացիայի և Հայաստանի համայնքների միության հետ համագործակցությամբ:
