Սահմանափակ պատասխանատվությամբ ընկերությունների բարձրագույն մարմին է հանդիսանում ընդհանուր ժողովը: Ընդհանուր ժողովը կարող է լինել հերթական կամ արտահերթ:
Ժողովը, բացի այլ իրավասություններից, մեծ դերակատարություն ունի ընկերության կողմից գործարքների կնքման հարցում:
Մասնավորապես, խոշոր գործարք կատարելու մասին որոշումն պարտադիր պետք է ընդունվի ընդհանուր ժողովի կողմից:
Իսկ ո՞ր դեպքում է գործարքը համարվում խոշոր:
Խոշոր է հանդիսանում այն գործարքը կամ մի քանի փոխկապակցված գործարքները, որոնք կապված են ընկերության կողմից ուղղակիորեն կամ անուղղակիորեն գույք ձեռք բերելու, օտարելու կամ օտարելու հնարավորության հետ, որի արժեքը կազմում է նման գործարքներ կատարելու մասին որոշման ընդունման օրվա դրությամբ ընկերության զուտ ակտիվների արժեքի 25 տոկոսից ավելին, եթե ընկերության կանոնադրությամբ նախատեսված չէ խոշոր գործարքի այլ չափ: Խոշոր չեն ճանաչվում այն գործարքները, որոնք կատարվում են ընկերության առօրյա տնտեսական գործունեության ընթացքում:
Առանց ընդհանուր ժողովի գումարման և համաձայնության կատարված խոշոր գործարքը կարող է ճանաչվել անվավեր դատարանի վճռով:
Ընկերության կանոնադրությամբ կարող է նախատեսվել, որ խոշոր գործարքներ կատարելու համար չի պահանջվում ընդհանուր ժողովի կամ ընկերության խորհրդի որոշումը:
Աղբյուրը` Իրավաբան.net