Մալազիայի Պութրաջայա քաղաքում ընթացող 16-րդ միջազգային հակակոռուպցիոն համաժողովի շրջանակներում Հայաստանից ժամանած պատվիրակությունը` ՔՀԿ-ների հակակոռուպցիոն կոալիցիայի քարտուղարության համակարգող, ՀԵԻԱ-ի նախագահ Կարեն Զադոյանը, ՀԵԻԱ-ի գործադիր տնօրեն Արտակ Սարիբեկյանը, ԵԱՀԿ երևանյան գրասենյակի հակակոռուպցիոն ծրագրերի համակարգող Նաիրա Գյուլնազարյանը պաշտոնական հանդիպում ունեցան Մալազիայի Հակակոռուպցիան հանձնաժողովի գլխավոր հանձնակատարի կանխարգելման հարցերով տեղակալ, 16-րդ միջազգային հակակոռուպցիոն համաժողովի կազմկոմիտեի նախագահ Մուստաֆար Ալիի  և Մալազիայի Հակակոռուպցիոն հանձնաժողովի գլխավոր հանձնակատարի մենեջմենթի և պրոֆեսիոնալիզմի հարցերով տեղակալ Զամիդան Աբդուլահի հետ, ով համակարգում է Մալազիայի հակակոռուպցիոն ակադեմիայի աշխատանքները: Հանդիպմանը մասնակցում էին նաև մի շարք բարձրաստիճան պաշտոնյաներ Մալազիայի Հակակոռուպցիոն հանձնաժողովից և Մալազիայի հակակոռուպցիոն ակադեմիայից:

Հանդիպման սկզբում պարոն Զադոյանը ներկայացրեց ՔՀԿ-ների հակակոռուպցիոն կոալիցիայի և ՀԵԻԱ-ի հակակոռուպցիոն գործունեությունը, իրականացվող հակակոռուպցիոն ծրագրերն ու աշխատանքները, հակակոռուպցիոն ոլորտի պետական քաղաքականությունը, ներկա վիճակն ու զարգացման հեռանկարները: Որից հետո տիկին Գյուլնազարյանը ներկայացրեց ԵԱՀԿ երևանյան գրասենյակի կողմից հակակոռուպցիոն ոլորտում իրականացվող ծրագրերը:

Այնուհետև  պարոն Մուստաֆար Ալին ներկայացրեց հանձնաժողովի և ակադեմիայի ստեղծման պատմությունը, ձեռք բերումները, առկա խնդիրներն ու առաջիկա անելիքները:

Հանդիպման ընթացքում կողմերը քննարկեցին միջազգային հակակոռուպցիոն շարժման, ազգային մակարդակներում անկախ հակակոռուպցիոն մարմինների և ուժեղ քաղաքացիական հասարակության կարևորության, ինչպես նաև հնարավոր համագործակցության, այդ թվում Մալազիայի հակակոռուպցիոն ակադեմիայի հետ համագործակցության վերաբերյալ հարցեր:

Հանդիպման ավարտին կողմերը փոխանակեցին հուշանվերներ:

Իրավաբան.net