Այսօր` 2015 սեպտեմբերի 3-ին իր աշխատանքները շարունակեց 16-րդ միջազգային հակակոռուպցիոն համաժողովը: Համաժողովի մասնակիցները մասնակցեցին հակակոռուպցիոն թեմաներով միաժամանակ ընթացող տարբեր կլոր սեղանների: Թեմաները արդիական են աշխարհի տարբեր երկրների այդ թվում Հայաստանի համար. Արմատախիլ անել անպատժելիությունը և ուժեղացնել բարեխղճությունը կառուցապատման ոլորտում, Վեց փոփոխություններ ուղղելու համար տեղեկատվություն հայտնողների ինստիտուտը, Կոռուպցիայի դեմ պայքարը իշխանությունների կողմից (ինչ է ճիշտ արվում և ինչը` սխալ) և այլն:  Քննարկումները անցնում էին հետաքրքիր, անկեղծ, ակտիվ և բովանդակային: Քննարկումների, որպես բանախոսներ, մասնակցում էին աշխարհի տարբեր ծայրերից ժամանած հակակոռուպցիոն ոլորտի հայտնի առաջնորդներ, գիտնականներ, պետական և հասարակական գործիչներ, միջազգային կազմակերպությունների և ԶԼՄ-ների ներկայացուցիչներ:

Կլոր սեղաններին հաջորդեց երկրորդ պլենար նիստը` Խաղաղություն, հավասարություն և սոցիալական արդարադատություն թեմայով, որի հիմնական նպատակն էր ուղենշել կոռուպցիայի դեմ պայքարի զարգացումն ու ներդրումները 2015 թվականից հետո:

Պլենար նիստին կրկին հաջորդեցին հակակոռուպցիոն և բարեխղճության տարբեր թեմաներով կազմակերպված կլոր սեղանները, որոնց ընթացքում մասնակիցները քննարկեցին կոռուպցիայի դեմ պայքարում երիտասարդական և սոցիալական շարժումների դերը, քաղաքացիական վերահսկողության, այդ թվում ՔՀԿ-ների դերը պետական գնումների ոլորտում, հանրության մոբիլիզացիան, որպես այդ ոլորտում անպատժելիության ավարտ և մի շարք այլ կարևոր թեմաներ:

Համաժողովի ընթացքում քաղված դասերը կօգտագործվեն արդեն մոտ ապագայում` տարբեր երկրներում հակակոռուպցիոն պայքարի ուժեղացման և կոռուպցիայի դեմ պայքարի կազմակերպչական կարողությունների զարգացման նպատակով:

Հիշեցնենք, որ Մալազիայի Պութրաջայա քաղաքում ընթանում է 16-րդ միջազգային հակակոռուպցիոն համաժողովը, որին մասնակցում են 1000-ից ավելի մասնակիցներ տարբեր երկրներից:

Վաղը համաժողովը կշարունակի իր աշխատանքները:

Իրավաբան.net