Ուրախ եմ, որ անցողիկ շեմը հաղթահարած «Մեր քաղաքը» դաշինքը վերջապես հրապարակեց իր որոշումը: Այս մասին ֆեյսբուքյան իր էջում գրել է «Մայր Հայաստան» դաշինքի ներկայացուցիչ Կարեն Սիմոնյանը։

«Հարգելի՛ գյումրեցիներ,

«Մայր Հայաստան» դաշինքը Գյումրու ավագանու արտահերթ ընտրություններին մասնակցում էր՝ նվազագույն քաղաքական նպատակ ունենալով «Քաղաքացիական պայմանագրի» իշխանազրկումը, իսկ առավելագույնը՝ քաղաքի կառավարման ղեկը ստանձնելը:
Մենք քարոզարշավից առաջ հրապարակել էինք մեր սկզբունքները և մեկ միլիմետր անգամ չենք շեղվել այդ սկզբունքներից:

Ուրախ եմ, որ անցողիկ շեմը հաղթահարած «Մեր քաղաքը» դաշինքը վերջապես հրապարակեց իր որոշումը: Սա համարում եմ բոլորիս հաղթանակը:

Այս պահին կարող եմ ասել, որ մենք նպաստեցինք, որպեսզի «Մայր Հայաստանի»նվազագույն խնդիրը՝ ՔՊ-ի իշխանազրկումը,իրականություն դառնա և ժողովրդի պահանջը կյանքի կոչվի:
Ուզում եմ հատուկ նշել, որ մենք ոչ թե կոալիցիա ենք կազմում կամ պաշտոնների սակարկության մեջ մտնում, այլ քվեարկում ենք՝հանուն ՔՊ-ի իշխանազրկման:

Մեր հետագա գործունեությունը քաղաքապետարանում և դրանից դուրս բխելու է բացառապես մեր այն ծրագրերից, որոնց համար քվե ենք ստացել և որոնք բխում են Գյումրու, գյումրեցիների շահերից:

Մեր առաջին քայլը լինելու է այն, որ Գյումրիում ազատ տնտեսական գոտի ստեղծելու և հարկային ռեժիմի առումով Գյումրին ազատ քաղաք հռչակելու մեր ծրագրի հետ կապված ուղերձի նախագիծը մտնի նորընտիր ավագանու օրակարգ և մեր ստորագրահավաքին միացած 7.700 գյումրեցու պահանջը դառնա ավագանու որոշում:

Մենք առաջնորդվել ու առաջնորդվելու ենք միայն գյումրեցու շահերով և մեր սկզբունքներով:
Եվս մեկ անգամ շնորհակալություն եմ հայտնում գյումրեցիներին, ովքեր իրենց քվեով և ակտիվությամբ սատարեցին մեզ, քվեարկեցին ՔՊ-ի իշխանազրկման և հանուն գյումրեցիների համախմբման: Գյումրեցին թիվ մեկ պահանջատերն ու շահառուն պետք է դառնա այս ամենի արդյունքում: Մենք ամեն ինչ արել ու անելու ենք դրա համար:

Հաղթանակ և միասնություն»,-նշել է նա:

Ավելի վաղ նա հայտատարել էր․ «Մենք չունենք որևէ քաղաքական ուժի հետ միավորվելու խնդիր, մեզ ոչ մի պաշտոն պետք չէ: Մենք չենք եկել ընտրություններին մասնակցենք, որ մանդատ ստանալուց հետո սակարկենք դա որևէ քաղաքական ուժի հետ: Մեր միակ խնդիրն իշխանազրկելն է ՔՊ-ին, և մենք մեր քվեն տալիս ենք հանուն դրա»։

Հիշեցնենք, որ այսօր՝ ապրիլի 3-ին, «Մեր քաղաքը» դաշինքի ղեկավար Մարտուն Գրիգորյանը հայտարարեց, որ կտա անհրաժեշտ քանակությամբ քվե՝ մյուս երկու ուժերի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության։

Նրա այս հայտարարությունը ողջունել էր նաև Ռուբեն Մխիթարյանը։