Ռուսաստանի Դաշնության արտաքին գործերի փոխնախարար Ալեքսանդր Պանկինը հայտարարել է, որ Հայաստանը չի ծանուցել Հավաքական անվտանգության պայմանագրի կազմակերպությունից (ՀԱՊԿ) դուրս գալու մասին, և Երևանը չի էլ պատրաստվում լքել կառույցը, այլ պարզապես սառեցրել է իր գործունեությունը։
«Արմենպրես»-ի հաղորդմամբ՝ ՌԴ փոխարտգործնախարարն այս մասին հայտնել է «ՌԻԱ Նովոստի»-ի հետ զրույցում։
«Երևանը մեզ չի ծանուցել հեռանալու մասին։ Նրանք (խմբ․ Հայաստանը) չեն պատրաստվում հեռանալ, նրանք սառեցրել են իրենց գործունեությունը, բայց միևնույն ժամանակ մնում են ՀԱՊԿ անդամ»,- ասել է Պանկինը։
Վերջինս նաև հույս է հայտնել, որ Հայաստան-ՀԱՊԿ իրավիճակը կկարգավորվի, և այդ առումով Երևանի և Մոսկվայի միջև ընթանում է երկխոսություն։
«Մենք միշտ լավագույնի ակնկալիք ունենք: Մենք երկխոսում ենք Երևանի հետ՝ ամբողջ օրակարգով՝ երկկողմ, տարածաշրջանային և միջազգային»,-ասել է Պանկինը։
Անդրադառնալով ՀԱՊԿ-ին Հայաստանի անդամակցության և կազմակերպությունում Երևանի ունեցած ներդրումներին՝ ՌԴ ԱԳ նախարարի տեղակալը նշել է, որ եթե մինչև 2025 թվականի վերջ Հայաստանը չվճարի ՀԱՊԿ բյուջեում իր մասնաբաժինը, կազմակերպության անդամ երկրները կարող են դիտարկել տարբեր սցենարներ, բայց, հավանաբար, ոչ մեկին չեն հեռացնի։
«Մինչև հունվարի 1-ը (խմբ․ 2026 թվական) կարող է իրավիճակ ստեղծվել, որ երկու տարի վճարումներ չլինելու դեպքում անդամ երկրները կարող են դիտարկել տարբեր սցենարներ»,- ասել է Պանկինը։
Հայաստանի վարչապետ Նիկոլ Փաշինյանը 2024 թվականի փետրվարին հայտարարել էր, որ Հայաստանը սառեցրել է իր մասնակցությունը Հավաքական անվտանգության պայմանագրի կազմակերպության աշխատանքներին։
«Ես գնահատում եմ, որ ՀԱՊԿ-ն չի կատարել անվտանգային ոլորտի պարտավորությունները Հայաստանի նկատմամբ, մասնավորապես 2021 թվականին, 2022 թվականին, և դա չէր կարող անցնել առանց հետևանքների։ Եվ հետևանքն էլ այն է, որ մենք գործնականում, ըստ էության, սառեցրել ենք մեր մասնակցությունը ՀԱՊԿ-ում»,- հայտարարել էր Փաշինյանը։
Հայաստանը դադարեցրել է ինչպես իր ներդրումը կազմակերպության բյուջեում, այնպես էլ ներկայացուցիչներ ուղարկել կազմակերպության միջոցառումներին և վարժանքներին։
