Էր Ռիադում բանակցություններ են տեղի ունեցել ռուսական և ամերիկյան պատվիրակությունների միջև։ Մոսկվան և Վաշինգտոնը քննարկել են երկկողմ հարաբերությունները, Ուկրաինայում իրավիճակի կարգավորումը և երկու երկրների ղեկավարների հանդիպման նախապատրաստումը։ Գրում է РИА Новости.
«Զրույցը, կարծում եմ, շատ օգտակար էր, մենք լսեցինք միմյանց, ես հիմքեր ունեմ ենթադրելու, որ ամերիկյան կողմը սկսել է ավելի լավ հասկանալ մեր դիրքորոշումը»,-նշել է ՌԴ արտգործնախարար Սերգեյ Լավրովը։
Կողմերը պայմանավորվել են ապահովել երկու պետությունների մայրաքաղաքներում դեսպանների արագ նշանակումը և մեկընդմիշտ լուծել դիվանագիտական առաքելությունների աշխատանքի խնդիրը։ Կողմերը կնշանակեն իրենց ներկայացուցիչներին, որոնք կաշխատեն Ուկրաինական հակամարտությունը դադարեցնելու ուղղությամբ։
«Ուկրաինայի հարցով ԱՄՆ հատուկ ներկայացուցիչ Քիթ Քելլոգը կբանակցի Կիևի և Եվրոպայի հետ Ուկրաինայի կարգավորման շուրջ, իսկ Վաշինգտոնը առանձին ներկայացուցիչ կնշանակի Ռուսաստանի հետ երկխոսության համար»,- ասել է Ռուսաստանի նախագահի օգնական Յուրի Ուշակովը։
Մոսկվան և Վաշինգտոնը պայմանավորվել են փոխշահավետ տնտեսական համագործակցության խոչընդոտները վերացնելու անհրաժեշտության շուրջ։
Նշվում է, որ նախագահներ Վլադիմիր Պուտինի և Դոնալդ Թրամփի հանդիպումը դժվար թե տեղի ունենա հաջորդ շաբաթ, նույնիսկ դժվար է ժամկետներ նշել, ինտենսիվ աշխատանք է պետք։ Մոսկվան և Վաշինգտոնը կաշխատեն պայմաններ ստեղծել առաջնորդների հանդիպման համար։
Բանակցությունները տևել են 4․5 ժամ։ Ռուսական կողմից հանդիպմանը մասնակցել են արտգործնախարար Սերգեյ Լավրովը և նախագահի օգնական Յուրի Ուշակովը, ամերիկյան կողմը ներկայացրել են ԱՄՆ պետքարտուղար Մարկո Ռուբիոն, նախագահի ազգային անվտանգության հարցերով օգնականը Մերձավոր Արևելքի հարցերով հատուկ բանագնացը։
