Մարիաննա Բաղինյան
Հունվարի 20-ին ավարտվեց Կոռուպցիայի կանխարգելման հանձնաժողովի անդամի թափուր պաշտոնում ընտրվելու նպատակով հայտ ներկայացնելու համար սահմանված վերջնաժամկետը։ Հունվարի 21-ին Մրցութային խորհուրդը նիստ գումարեց՝ ներկայացված երկու հայտերն ուսումնասիրելու նպատակով։ Երկուսն էլ համապատասխանում էին օրենսդրությամբ սահմանված չափանիշներին, հետևաբար և հաստատվեցին խորհրդի կողմից։
Այս մասին հայտնում է ԱԺ պատգամավոր, խորհրդի նախագահ Արուսյակ Ջուլհակյանը։
«Այսպիսով՝ ունենք երկու հավակնորդ՝ Մարիաննա Բաղինյանը և Գարիկ Մինասյանը, որոնց բարեվարքությունն ուսումնասիրելու նպատակով այսօր արդեն
Մրցութային խորհուրդը, ԱԺ աշխատակազմի միջոցով, հարցումներ է ուղարկել մի շարք պետական և տեղական ինքնակառավարման մարմինների։
Հարցումների պատասխանները ստանալուն պես Մրցութային խորհուրդը կգումարի նիստ, կուսումնասիրի դրանք, և կնշանակի մրցույթի հարցազրույցի փուլի օրը և ժամը, ինչի մասին կտեղեկացնեմ հավելյալ»,-նշեց նա։
Հավելենք՝ Բաղինյանն այս պահին էլ զբաղեցնում է հանձնաժողովի բարեվարքության վերաբերյալ ուսումնասիրությունների իրականացման վարչության պետի պաշտոնը։
