Դեկտեմբերի 20-ին հիբրիդային ձևաչափով անցկացվեց Իրավաբանների հայկական ասոցիացիայի (ԻՀԱ) խորհրդի տարեվերջյան նիստը՝ ԻՀԱ նախագահ Կարեն Զադոյանի նախագահությամբ: Նիստին մասնակցում էին խորհրդի անդամներ Մարատ Ատովմյանը, Կարեն Քոչարյանը, Արփինե Եղիկյանը և Աստղիկ Մատինյանը։

Օրակարգի առաջին հարցով ԻՀԱ նախագահը ներկայացրեց կազմակերպության 2024 թվականի գործունեության հաշվետվությունը: Շեշտադրում կատարվեց կառույցի կողմից իրականացվող ծրագրերի՝ 2024 թվականին գրանցած արդյունքներին, տարվա ընթացքում իրականացված միջազգային կարևորագույն այցերին, հանդիպումներին։ Կարեն Զադոյանը խոսեց նաև ԻՀԱ-ի կողմից գործարկվող Iravaban.net մասնագիտացված լրատվականի աշխատանքներին և արդյունքներին։

Այնուհետև խորհրդի անդամների կողմից քննարկվեց 2024 թվականի ընթացքում ԻՀԱ անդամների կողմից անդամավճարների վճարման ընթացակարգը, արդյունքները։

Նիստի ընթացքում հատուկ ուշադրություն հատկացվեց 2025 թվականի հունիսին նախատեսվող միջազգային իրավաբանական համաժողովի կազմակերպչական հարցերին: Այս թեմայով զեկույցներով հանդես եկան Կարեն Զադոյանը և Մարատ Ատովմյանը: Խորհրդի անդամները ներկայացրին իրենց առաջարկություններն ու դիտարկումները համաժողովի արդյունավետ կազմակերպման վերաբերյալ:

Նիստի ավարտին քննարկվեցին նաև ընթացիկ այլ հարցեր, որից հետո ԻՀԱ նախագահ Կարեն Զադոյանն ամփոփեց հանդիպման արդյունքները՝ շնորհավորելով ներկաների գալիք ամանորը։