Քասախի կիրճում տեղի ունեցած խուլիգանական արարքների, բռնությունների, զենքի կիրառման և երկու անձի հրազենային վնասվածքներ ստանալու վերաբերյալ վարույթի շրջանակում ձերբակալվել է 11 անձ։ Այս մասին հայտնում է ՀՀ քննչական կոմիտեն։
Հիշեցնենք, որ հոկտեմբերի 20-ին Քասխի կիրճում` «Գալուստի ձոր» կոչվող հանգստյան գոտու ճանապարհին մի խումբ անձանց միջև վիճաբանություն էր տեղի ունեցել, որի ժամանակ հնչել էին կրակոցներ, կային վիրավորներ:
Պարզվել է, որ Աշտարակ քաղաքի 65-ամյա բնակիչն ու նրա որդին վիճել են մոտ 40-50 անձի հետ, որոնք սեռական բնույթի հայհոյանքներ հնչեցնելով, քարեր ու ջրով լցված շշեր շպրտելով՝ մոտեցել են հոր և որդու ուղղությամբ։
«Մոտեցող անձինք, չենթարկվելով ոստիկանության աշխատակիցների՝ հակաիրավական գործունեությունը դադարեցնելու օրինական պահանջներին, բռնություն են գործադրել Աշտարակ քաղաքի 65-ամյա բնակչի և նրա որդու նկատմամբ ու քաշքշել են ոստիկանության աշխատակիցներին։ Նրանց կողմից նետված առարկաներից դիպել են նաև ոստիկանության ծառայողներին»,– ասված է հաղորդագրությունում։
Երբ մոտեցած անձիք սկսել են քարերով, ձեռքերով և ոտքերով հարվածել 65-ամյա քաղաքացուն` նրա որդին ինքնաձիգով մի քանի կրակոց է արձակել։
Դրա հետևանքով Աշտարակ քաղաքի 52-ամյա և Ուջան գյուղի 26-ամյա երկու բնակիչ ոտքի շրջանի հրազենային վնասվածքներ են ստացել և տեղափոխվել բուժկենտրոն։
Դեպքի առթիվ ՀՀ քրեական օրենսգրքի 166-րդ հոդվածով (առողջությանը ծանր վնաս պատճառելը), 297-րդ հոդվածի 3-րդ մասով (խուլիգանություն, որ կատարվել է զենքի կամ մարմնական վնասվածք պատճառելու համար նախապես պատրաստված միջոցի գործադրմամբ կամ դրա գործադրման սպառնալիքով), 335-րդ հոդվածի 1-ին մասով (ապօրինի կերպով հրազեն ձեռք բերելը, իրացնելը, պահելը, փոխադրելը, առաքելը կամ կրելը) և 452-րդ հոդվածի 4-րդ մասի 2-րդ կետով (զենքի գործադրմամբ` պաշտոնատար անձի օրինական ծառայողական կամ քաղաքական գործունեությանը միջամտելը) նախաձեռնվել է քրեական վարույթ։
Դեպքի վայրի զննությամբ հայտնաբերվել են կրակված պարկուճներ, 2 դանակ, 1 ձեռնափայտ և այլ առարկաներ։
Ոստիկանությունից ստացվել է դեպքի վայրում վերցված հանցագործության գործիք հրազենը։
Նախաքննության ընթացքում հարցաքննվել են տասնյակ անձինք, կատարվել են խուզարկություններ, նշանակվել են դատաբժշկական փորձաքննություններ։
