Քաղաքացիական գործերի քննության ժամանակ համապատասխան հիմքերի առկայության դեպքում, Դատարանը կայացնում է որոշում` հայցը կամ դիմումն առանց քննության թողնելու մասին` եռօրյա ժամկետում պատշաճ ձևով ուղարկելով գործին մասնակցող անձանց:
Դատարանի որոշման մեջ պետք է լուծվի գործին մասնակցող անձանց միջև դատական ծախսերը բաշխելու հարցը:
Գործին մասնակցող անձինք հայցը կամ դիմումն առանց քննության թողնելու մասին առաջին ատյանի դատարանի որոշումը կարող են բողոքարկել վերաքննիչ դատարան հայցվորի կողմից այն ստանալուց հետո` եռօրյա ժամկետում: Հարկ է նշել, որ գործին մասնակցող անձինք չեն կարող հստակ իմանալ, թե հայցվորը ե՞րբ է ստացել որոշումը, այդ իսկ պատճառով նրանք կարող են բողոքարկել որոշումը իրենց ստանալուց հետո եռօրյա ժամկետում՝ խնդրելով հարգելի համարել բաց թողնված ժամկետը:
Հայցը կամ դիմումն առանց քննության թողնելու մասին որոշումը վերացվելու դեպքում գործի վարույթը համարվում է վերսկսված:
Հայցը կամ դիմումն առանց քննության թողնելու մասին որոշումն անփոփոխ թողնելու մասին որոշումն ստանալուց հետո դատարանը պարտավոր է գործին մասնակցող անձանց միջնորդությամբ մեկշաբաթյա ժամկետում վերացնել հայցի ապահովմանն ուղղված միջոցները:
Հայցը կամ դիմումն առանց քննության թողնելու համար հիմք հանդիսացած հանգամանքները վերանալուց հետո հայցվորը կամ դիմողն իրավունք ունի դիմելու դատարան` գործով վարույթը վերսկսելու համար:
