Ազգային ժողովի «Հայաստան» խմբակցությունը Սահմանադրական դատարանի դատավոր Սեդա Սաֆարյանի լիազորությունները դադարեցնելու հարցով Սահմանադրական դատարան դիմելու մասին որոշման նախագծի փակ քվեարկությանը 30 պատգամավոր է մասնակցե։
Նախագիծը 30 «կողմ» և 0 «դեմ» ձայն է ստացել, այն չի ընդունվել։ Այսպիսով, Սեդա Սաֆարյանի լիազորությունները դադարեցնելու հարցով Ազգային ժողովը ՍԴ չի դիմի։
Խորհրդարանական մեծամասնությունը հայտարարել էր, որ չի մասնակցի քվեարկությանը։
Հիշեցնենք, որ նախագծի ներկայացման համար հիմք է հանդիսացել փաստաբաններ Արսեն Բաբայանի և Սոս Հակոբյանի համատեղ դիմումը՝ ուղղված ԱԺ խմբակցություններին։
«․․․Ողջամիտ ենթադրություն է ձևավորվում, որ Սեդա Սաֆարյանը խախտել է Սահմանադրական դատարանի դատավորի համար սահմանված անհամատեղելիության պահանջները, որի պայմաններում ԱԺ-ն լիազորված է դիմելու Սահմանադրական դատարանին՝ դատավորի լիազորությունների դադարեցման վերաբերյալ դիմումով»,-նշվում է հիմնավորման մեջ։
Նախագծում ասվում է, որ դատավորի պաշտոնը զբաղեցնելու ընթացքում Սաֆարյանը զբաղվել է նաև ձեռնարկատիրական գործունեությամբ։
Սահմանադրական դատարանի դատավոր Սեդա Սաֆարյանը հունվարի 26-ին Iravaban.net-ի հետ զրույցում անդրադարձել էր հարցին։
«Այդպիսի խնդիր չկա, որ փորձեն կրակ վառեն, ձեռքերն էլ տաքացնեն։ Դա մի փոքրիկ խնդիր է, որի հետ կապված քննարկում եղել է և չեմ կարծում, որ դա կարող է բնորոշվել որպես «ներկայացուցչության իրականացում»։ Գուցե դատարանին ունեն հարցեր ուղղելու, դատարանի չեն ուղղում, ինձ են ուղղում»,-նշել էր Սաֆարյանը։
