Ուկրաինան ռուսական զորքերի կողմից զանգվածային հրթիռային հարձակման տակ է։ Այդ մասին հայտնում է Ukrіnform-ը։

РИА Новости-ն գրում է, որ ռուս զինվորականները նոր հարվածներ են հասցրել Ուկրաինայի ռազմական և էներգետիկ օբյեկտներին, ինչի մասին ասվում է պաշտպանության նախարարության կողմից հոկտեմբերի 31-ին հատուկ ռազմական գործողության ընթացքի վերաբերյալ զեկույցում։

«Ռուսաստանի Դաշնության Զինված ուժերը շարունակել են հեռահար օդային և ծովային գերճշգրիտ զենքերով հարվածները Ուկրաինայի ռազմական հրամանատարության և էներգետիկ համակարգերի դեմ: Հարվածների նպատակներն իրականացվել են: Բոլոր նշանակված թիրախները խոցվել են», – ասված է զեկույցում։

Առավոտյան ամբողջ Ուկրաինայում օդային տագնապի մասին է հայտարարվել․ պայթյուններ են գրանցվել Կիևում, Խարկովում, Զապորոժյեում և այլ քաղաքներում։ Բացի այդ, լրատվամիջոցները գրում են Դնեպրի, Դնեստրի և Կրեմենչուգի հիդրոէլեկտրակայանների վրա հրթիռային հարվածների մասին։

—————

Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:

ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։

Գերագույն Ռադան Ուկրաինայում ռազմական դրություն է մտցրել։

Ռուսաստանի Դաշնությունում սեպտեմբերի 21-ին մասնակի զորահավաք է հայտարարվել։