ՌԴ ԱԳ նախարար Սերգեյ Լավրովը Ուգանդայում հայտարարել է, որ Մոսկվան երբեք չի հրաժարվել Ուկրաինայի հետ բանակցություններից, ռազմական գործողություններն ավարտվում են բանակցությունների սեղանի շուրջ, սակայն Կիևից պատասխան չկա, փոխանցում է РИА Новости-ն։
«Երբ ուկրաինական կողմը առաջարկել էր բանակցություններ վարել ռազմական գործողության վաղ փուլում, մենք համաձայնեցինք, մի քանի փուլ բանակցություններ ընթացան, ինչը հանգեցրեց մարտի 29-ին Ստամբուլում տեղի ունեցած բանակցություններին, երբ ուկրաինական կողմն առաջարկեց պայմանագրի տարբերակը։ Դրան մենք աջակցել ենք և տեղեկացրել Կիևի մեր գործընկերներին։ Բայց դրանից հետո մենք նրանցից ոչ մի արձագանք չենք ստացել, թեև, նորից եմ ընդգծում, մենք համաձայնել ենք նրանց մոտեցմանը, ըստ էության»,- ասել է Լավրովը։
Նա հավելել է, որ Ռուսաստանի Դաշնությունը տեղյակ է, թե նրանց գործընկերները, ինչպիսիք են ԱՄՆ-ը, Մեծ Բրիտանիան և եվրոպական մի շարք երկրներ, արգելել են ուկրաինացիներին բանակցել ռուսների հետ՝ իր նշած հիմքով։
«Ես մի քանի օր առաջ տված հարցազրույցում ասացի, որ Ռուսաստանը նախապաշարմունքներ չունի Ուկրաինայի հետ բանակցությունների նկատմամբ: Անմիջապես, ընդամենը մի քանի ժամ անց Պետդեպարտամենտի խոսնակն ասաց, որ Միացյալ Նահանգները կարծում է, որ այժմ Ուկրաինայի համար Ռուսաստանի հետ բանակցելու ժամանակը չէ. եզրակացություններ արեք՝ հարցրեք ձեր ամերիկացի գործընկերներին, թե որն է պատճառը»,- ընդգծել է Լավրովը։
