Ավելի քան 4,5 միլիոն քաղաքացի, այդ թվում՝ 6,472 օտարերկրացիներ 18 նահանգից, որպես կենդանի վահան պահվում են Ուկրաինայի խոշոր բնակավայրերում ազգայնականների կողմից: Այս մասին ասել է ՌԴ Պաշտպանության ազգային կառավարման կենտրոնի ղեկավար գեներալ-գնդապետ Միխայիլ Միզինցևը, փոխանցում է РИА Новости-ն:
«Ազգայնականները շարունակում են ավելի քան 4,5 միլիոն խաղաղ բնակիչների պահել Կիևում, Խարկովում, Չեռնիգովում, Սումիում և ավելի քան երկու տասնյակ այլ խոշոր բնակավայրերում՝ որպես կենդանի վահան», – ասել է գեներալը:
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
