ՌԴ նախագահ Վլադիմիր Պուտինը հանդիպում է ունեցել Անվտանգության խորհրդի մշտական անդամների հետ։ Պետության ղեկավարը նրանց տեղեկացրել է Ուկրաինայում գործողության ընթացքի, ինչպես նաև իր միջազգային հեռախոսային կապերի մասին։ Այս մասին ուրբաթ օրը՝ մարտի 18-ին, հայտնել է նախագահի մամուլի քարտուղար Դմիտրի Պեսկովը։
«Հանդիպմանը քննարկվել է ներկայիս իրավիճակը, շարունակվել է մտքերի փոխանակումը Ուկրաինայում ՌԴ ԶՈւ-ի հատուկ գործողության վերաբերյալ։ Նախագահը հանդիպման մասնակիցներին մանրամասն տեղեկացրել է իր բազմաթիվ միջազգային հեռախոսային կապերի մասին»,- լրագրողներին ասել է Պեսկովը։
Բացի այդ, հայտնի է դարձել, որ Ֆրանսիայի նախագահ Էմանուել Մակրոնը մտադիր է մոտ ժամանակներս կրկին խոսել Պուտինի հետ, հայտարարել է Ֆրանսիայի կառավարության խոսնակ Գաբրիել Աթալը։
«Չգիտեմ՝ դա կլինի այսօր, թե մոտ օրերս։ Իրավիճակը Ուկրաինայում ներկայումս լարված է, և մեր խնդիրն է չհետևել հակամարտության սրման տրամաբանությանը, մեր նպատակը հակամարտությունը դադարեցնելն է»,-ասել է Աթալը։
Ավելի վաղ Կրեմլը բացահայտել էր մարտի 18-ին Պուտինի և Շոլցի հեռախոսազրույցի մանրամասները։ Այսպիսով, Ռուսաստանի ղեկավարը զրույցի ընթացքում նշել է, որ ուկրաինական կողմը փորձում է ձգձգել բանակցային գործընթացը։ Միաժամանակ նա ընդգծել է Մոսկվայի պատրաստակամությունը՝ «շարունակել լուծումների որոնումը Ուկրաինայում՝ հայտնի սկզբունքային մոտեցումներին համապատասխան»։
Երկրի ղեկավարը նաև ընդգծել է, որ Ռուսաստանի զինված ուժերն անում են հնարավոր ամեն ինչ խաղաղ բնակիչների կյանքը փրկելու համար, այդ թվում՝ կազմակերպելով անվտանգ միջանցքներ բնակչության համար։
