Ռուսաստանը հարգում է ուկրաինացի ժողովրդին և մտադիր չէ ոտնահարել այս երկրի քաղաքացիների շահերը: Այս մասին այսօր՝ մարտի 1-իյն, հայտարարել է ՌԴ արտգործնախարար Սերգեյ Լավրովը՝ ելույթ ունենալով ՄԱԿ-ի Մարդու իրավունքների խորհրդի (ՄԻԽ) նիստում տեսաուղերձի ձևաչափով, փոխանցում է «ՏԱՍՍ» լրատվական գործակալությունը:
«Ինչպես նախագահ Վլադիմիր Պուտինը բազմիցս ընդգծել է, մենք անմնացորդ հարգանքով ենք վերաբերվում ուկրաինացի ժողովրդին, նրա լեզվին և ավանդույթներին: Մենք մտադիր չենք որևէ կերպ ոտնահարել Ուկրաինայի քաղաքացիների շահերը, որոնց հետ միասնական ենք ոչ միայն ընդհանուր ազգակցական, այլև պարզապես արյունակցական կապերով: Այսօր Ռուսաստանում բնակվում են միլիոնավոր ուկրաինացիներ։ Նրանք մեզ են պատկանում։ Միասին մենք միշտ եղել ենք և կլինենք բազմիցս ավելի ուժեղ և հաջողակ»,- ասել է Լավրովը:
Ուկրաինայում Ռուսաստանի Դաշնության հատուկ գործողությունը նպատակ ունի փրկել մարդկանց, ապառազմականացնել և ապազգայնացնել այս երկիրը:
«Արևմուտքի կողմից աջակցվող պետական հեղաշրջման արդյունքում Կիևում իշխանությունը զավթած ուլտրաազգայնականներն ու նեոնացիստները իրական տեռոր սանձազերծեցին: Ուկրաինայում ստեղծված իրավիճակը Արևմուտքի հավքական քաղաքականության արդյունքն էր։ Ռուսաստանը հուսով է, որ ուկրաինական կողմը կգիտակցի պատվիրակությունների բանակցություններում անկախության և բանակցելու անհրաժեշտությունը։ Պետք է դադարեցնել Կիևում ժողովրդի շահերը դավաճանելու և Ուկրաինան հակառուսական դարձնելու փորձերը»,- նշել է Լավրովը:
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։
«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:
Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։
Գերագույն Ռադան Ուկրաինայում ռազմական դրություն է մտցրել։ Ուկրաինայի ՆԳՆ-ն զոհերի և վիրավորների նախնական թիվ է հայտնում։
