ԵԱՀԿ դիտորդները փետրվարի 16-ի երեկոյան Դոնբասի շփման գծի երկայնքով գրանցել են 500 պայթյուն, որոնց ինտենսիվությունը նվազել է փետրվարի 17-ին: Այս մասին հայտնում է Ուկրաինայում ԵԱՀԿ հատուկ դիտորդական առաքելության ղեկավար Յաշար Հալիթ Չևիկը, փոխանցում է «ՌԻԱ Նովոստին»:
«Անցած գիշեր և այսօր Կիևի ժամանակով ժամը 11:20-ն ընկած ժամանակահատվածում հատուկ դիտորդական առաքելությունն արձանագրել է 500 պայթյուն շփման գծի երկայնքով: Ժամը 11:20-ից հետո մենք գրանցել ենք մոտ 30 պայթյուն, ուստի լարվածությունը կարծես թե նվազում է»,- ասել է դիտորդական առաքելության ղեկավարը՝ ՄԱԿ-ի անվտանգության խորհրդի նիստում ելույթ ունենալիս:
Նրա խոսքով՝ առաքելությունը կոչ է արել հակամարտող կողմերին խստորեն պահպանել հրադադարի հետ կապված պարտավորությունները։ «Անհապաղ դեէսկալացիան չափազանց կարևոր է իրավիճակի հետագա սրացումից խուսափելու համար»,- ասել է նա:
Դոնեցկի և Լուգանսկի ներկայացուցիչները փետրվարի 17-ի առավոտյան հայտնել են, որ ուկրաինական զինված ուժերը կրակ են բացել իրենց դիրքերի ուղղությամբ։
