Երևանի պետական համալսարանի հոգաբարձուների խորհուրդը 12 «կողմ», 3 «անվավեր», 5 «դեմ» ձայների հարաբերակցությամբ համալսարանի ռեկտոր ընտրեց Հովհաննես Հովհաննիսյանին։

Նիստն անցնում էր դռնփակ, մասնակցում էին հոգաբարձուների խորհրդի 20 անդամ՝ նախագահ Սուրեն Պապիկյանի գլխավորությամբ: Միակ թեկնածուն ԵՊՀ ռեկտորի պաշտոնակատար Հովհաննես Հովհաննիսյանն էր, նա համալսարանի ռեկտորի պաշտոնակատար էր նշանակվել սույն թվականի օգոստոսի 5-ին:

Հովհաննիսյանը ծնվել է 1980թ. մարտի 5-ին Երևանում:

1996թթ. ավարտել է Երևանի թիվ 149 օտար լեզուների վարժարանը:

2000թ.՝ Երևանի պետական համալսարանի աստվածաբանության ֆակուլտետը, 2002թ.՝ նույն ֆակուլտետի մագիստրատուրան, միևնույն ժամանակ ՀՀ պետական կառավարման դպրոցը՝ ստանալով պետական ծառայողի որակավորում: 2007թ.՝ ԵՊՀ կրոնի պատմության եւ տեսության ամբիոնի ասպիրանտուրան: Պատմական գիտությունների դոկտոր, դոցենտ:

Վերապատրաստման մի շարք դասընթացներ է անցել՝ Երիտասարդ դասախոսների ծրագիր Վանդերբիլթի համալսարանում (JFDP) (2008թ., ԱՄՆ), Գերմանական ակադեմիական աջակցության հետդոկտորական ծրագիր Տյուբինգենի համալսարանում (2010-2011թթ., Գերմանիա), ՀՀ դիվանագիտական ակադեմիա (2010թ., Երևան), հետդոկտորական ուսուցում Յեյլի համալսարանում (2012-2013թթ., ԱՄՆ): Հետազոտական աշխատանք է կատարել Գոտինգեն քաղաքի Մաքս Պլանկի անվան կրոնական և էթնիկ բազմազանության հետազոտական ինստիտուտում (2014թ., Գերմանիա):

2003 թվականից դասավանդում է ԵՊՀ կրոնի պատմության և տեսության ամբիոնում, 2006-2008թթ.՝ Գավառի պետական համալսարանում, 2014թ.՝ Հայաստանի ամերիկյան համալսարանում: Դասավանդել է Վ. Բրյուսովի պետական լեզվաբանական եւ Մ. Հերացու անվան պետական բժշկական համալսարաններում: Հանրային քաղաքականության ինստիտուտ հետազոտական կենտրոնի համահիմնադիր է (2014թ.): 21.05.2018-14.01.2019թթ.՝ ՀՀ կրթության և գիտության փոխնախարար:

Միջազգային մի շարք գիտական կազմակերպությունների անդամ է:

Հեղինակ է մեկ մենագրության և միջազգային հեղինակավոր ամսագրերում հրատարակված քառասունից ավելի գիտական հրապարակումների:

2018թ. դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի համապետական ընտրական ցուցակով:

Ունի երկու զավակ: