Միացյալ Նահանգները պատժամիջոցներ է կիրառել իրանական Emennet Pasargad կիբեր ընկերության և նրա վեց աշխատակիցների նկատմամբ՝ 2020 թվականին ԱՄՆ նախագահական ընտրությունների վրա ազդելու փորձի համար։ Այս մասին հինգշաբթի օրը հայտնել է ԱՄՆ ֆինանսների նախարարությունը։
Այս մասին հայտնում է «ՏԱՍՍ»-ը։
«Այսօր ԱՄՆ ֆինանսների նախարարության արտասահմանյան ակտիվների գրասենյակը վեց իրանցի ֆիզիկական և մեկ իրանական իրավաբանական անձերի է ներառել [պատժամիջոցների] ցուցակում՝ 2020 թվականի ԱՄՆ նախագահական ընտրությունների վրա ազդելու փորձի համար», – ասվում է գործակալության հայտարարության մեջ։
Ըստ նախարարության՝ նրանք օնլայն գործողություն են իրականացրել՝ վախեցնելու և ազդելու ամերիկացի ընտրողների վրա, ինչպես նաև խաթարելու ընտրողների վստահությունը և տարաձայնություններ սերմանելու 2020 թվականի նախագահական ընտրությունների համատեքստում:
ԱՄՆ ֆինանսների նախարարության տվյալներով՝ Արդարադատության նախարարությունը նաև հինգ մեղադրանք է ներկայացրել Նյու Յորքում սև ցուցակում հայտնված երկու իրանցիների դեմ։ Իր հերթին Պետդեպարտամենտն առաջարկում է մինչև 10 միլիոն դոլար պարգև՝ այս երկու անձանց գործունեության մասին տեղեկատվության համար։
CNBC-ն մեջբերում է մեղադրական եզրակացությունից հատվածներ, որոնցում ասվում է, որ երկու իրանցիներ, ովքեր այս փաստաթղթերում կոչվում են «փորձառու հաքերներ», նույնպես էլեկտրոնային նամակներ են ուղարկել ընտրողներին՝ սպառնալիքներով ամերիկյան ծայրահեղ աջ «Հպարտ տղաներ» կազմակերպության անունից: Նման հաղորդագրություններից մեկում, որն իբր ուղարկվել է ԱՄՆ Դեմոկրատական կուսակցության տասնյակ հազարավոր կողմնակիցներին, ասվում էր. «Դուք ընտրությունների օրը կքվեարկեք հանրապետական Դոնալդ Թրամփի օգտին, հակառակ դեպքում մենք կգանք ձեզ համար»:
