Թուրքիայի նախագահ Ռեջեփ Թայիփ Էրդողանը Նյու Յորք այցից առաջ կայացած մամուլի ասուլիսի ժամանակ ասել է, որ Զանգեզուրի միջանցքի բացումը քաղաքական խնդիր է՝ ի պատասխան Հայաստանի վարչապետ Նիկոլ Փաշինյանի հայտարարության:
Այս մասին հայտնում է 1tv.ge-ն։
«Կարծում եմ, որ Փաշինյանը մի կողմից դեմ է Զանգեզուրի միջանցքի բացմանը, իսկ մյուս կողմից ցանկանում է հանդիպել ինձ հետ: Եթե նա ցանկանում է հանդիպել Էրդողանի հետ, ապա պետք է Հայաստանը դրական քայլեր ձեռնարկի: Հանդիպման հարցը մեզ համար փակված չէ», – ասել է Թուրքիայի առաջնորդը:
Էրդողանի խոսքով ՝ Վրաստանի վարչապետն իրեն տեղեկացրել է այս հանդիպումն անցկացնելու Փաշինյանի ցանկության մասին:
«Հայաստանը դրա համար պետք է դրական քայլեր ձեռնարկի: Եթե այս հանդիպումը կայանա, ապա Թուրքիան կարող է դիվանագիտական կապեր հաստատել», – հավելել է Էրդողանը:
Թուրքիայի նախագահը հույս հայտնեց, որ Զանգեզուրի միջանցքի բացումը կվերացնի Ադրբեջանի և Հայաստանի հարաբերություններում առկա խնդիրները:
