Վարչապետ Նիկոլ Փաշինյանի սեպտեմբերի 15-ի որոշմամբ՝ Սերգեյ Ատոմյանը ազատվել է Հայաստանի Հանրապետության Արարատի մարզպետի տեղակալի պաշտոնից և այլ պաշտոնի նշանակվել։
«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 7-րդ մասով՝ Սերգեյ Ատոմյանին նշանակել քրեակատարողական ծառայության պետ»,-նշված է որոշման մեջ:
Նշենք, որ սեպտեմբերի 3-ին քրեակատարողական ծառայության պետի ժամանակավոր պաշտոնակատարի պաշտոնից ազատվեց Արթուր Գոյունյանը։
Իրավաբան․net-ը ներկայացնում է Ատոմյանի կենսագրությունը․
Ծնվել է 1986թ. հուլիսի 6-ին Արարատի մարզի Դվին գյուղում:
2004-2006թթ. ծառայել է ՀՀ ոստիկանության ներքին զորքերում: Պահեստազորի ավագ լեյտենանտ:
2010թ. ավարտել է Գավառի պետական համալսարանի իրավագիտության ֆակուլտետը: 2017թ.՝ ՀՀ պետական կառավարման ակադեմիայի մագիստրատուրան: Իրավագիտության մագիստրոս:
2012-2014թթ. աշխատել է ՀՀ ոստիկանության քննչական գլխավոր վարչության Արմավիրի մարզային վարչության, ապա Արարատի մարզային քննչական վարչության քննիչ: 2014-2018թթ.՝ ՀՀ քննչական կոմիտեի Արարատի մարզային քննչական վարչության քննիչ: Արդարադատության կապիտան է, արդարադատության առաջին դասի խորհրդական:
2018 թվականի դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի թիվ 5 ընտրատարածքի տարածքային ընտրական ցուցակով:
Ամուսնացած է, ունի մեկ զավակ:
