Ազգային ժողովում մտքերի փոխանակության ժամանակ ելույթ ունեցավ «Հայաստան» խմբակցության պատգամավոր Աննա Գրիգորյանը:
Նա անդրադարձ կատարեց Գորիս-Կապան ճանապարհին ոստիկանական անցակետերի տեղադրման հարցին:
«ԱԺ նախագահը փաստացի ընդունեց, որ չի տիրապետում, թե ինչ է կատարվում Սյունիքում: Սա պետք է ցավով արձանագրել, որովհետև ԱԺ նախագահն ի պաշտոնե 2-րդ մարդն է ՀՀ-ում, և եթե թիվ մեկ մանդատ ունեցող կառույցի ղեկավարը չգիտի՝ ինչ է կատարվում Սյունիքում, սա ինչպե՞ս կարելի է բացատրել»,-նշեց նա:
Աննա Գրիգորյանը վստահ է, որ Ալեն Սիմոնյանը կարդացել է նոյեմբերի 9-ի հայտարարությունը:
«Քանի որ Կովսականն ու Սանասարը որևէ կերպ ներառված չեն եղել նոյեմբերի 9-ի հայտարարության մեջ, հետևաբար՝ այո՛, այդ տարածքները հանձնել եք: Հանձնել եք Գորիս-Կապան, այն է Հայաստան-Իրան միակ միջպետական ճանապարհը»,-ասաց «Հայաստան» խմբակցության պատգամավորը:
Ավելի վաղ Ազգային անվտանգության ծառայությունից Իրավաբան․net-ին հայտնել են, որ սույն թվականի սեպտեմբերի 12-ին, ժամը 12։00-ից Գորիս-Կապան միջպետական ճանապարհի Որոտան բնակավայրի մոտ Ադրբեջանի վերահսկողության տակ գտնվող Էյվազլի բնակավայրի հատվածում, Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում։
ՀՀ ազգային անվտանգության ծառայության սահմանապահ զորքերի և ՌԴ ԱԴԾ սահմանապահ ծառայության զինծառայողների կողմից համատեղ աշխատանքներ են իրականացվում առաջացած իրավիճակը կարգավորելու ուղղությամբ։
Մանրամասները՝ տեսանյութում
